رجسٹریشن کے بغیر یاترا پر نہ آنے کی اپیل‘ضوابط پر عمل کرنے کی ہدایت
ویب ڈیسک
سری نگر؍۴ جولائی
جموں و کشمیر کے لیفٹیننٹ گورنر منوج سنہا نے آج شری امرناتھ جی یاتراکے مجموعی انتظامات اور زمینی صورتحال کا جائزہ لینے کے لیے ایک اعلیٰ سطحی اجلاس کی صدارت کی۔
اجلاس میں لیفٹیننٹ گورنر نے یاتریوں کی آمد و رفت، ٹریفک انتظامات، سیکورٹی، رہائش، رجسٹریشن کی صورتحال اور دیگر انتظامی و لاجسٹک امور کا تفصیلی جائزہ لیا تاکہ یاترا کو محفوظ، منظم اور خوش اسلوبی سے جاری رکھا جا سکے۔
اجلاس کے دوران بتایا گیا کہ غیر معمولی تعداد میں یاتری بغیر درست رجسٹریشن کے جموں و کشمیر پہنچ رہے ہیں، جس کے باعث رجسٹرڈ یاتریوں کو طویل انتظار کا سامنا کرنا پڑ رہا ہے۔
لیفٹیننٹ گورنر نے زور دے کر کہا کہ یاترا سپریم کورٹ کے احکامات کے مطابق مقررہ یومیہ حد (سیلنگ) کے تحت جاری ہے، اس لیے تمام یاتریوں کے تحفظ، سلامتی اور سہولت کو یقینی بنانے کے لیے رجسٹریشن شیڈول پر سختی سے عمل کرنا ناگزیر ہے۔
اجلاس میں ایک بار پھر واضح کیا گیا کہ صرف وہی یاتری مقدس غار کی طرف جانے والے راستوں پر آگے بڑھنے کے مجاز ہوں گے جن کے پاس مقررہ تاریخ کے لیے درست یاترا رجسٹریشن موجود ہوگی۔
لیفٹیننٹ گورنر نے ان تمام عقیدت مندوں سے، جنہوں نے ابھی تک رجسٹریشن نہیں کرائی، اپیل کی کہ وہ آئندہ چند روز تک اپنے سفر کو مؤخر کریں تاکہ جموں و کشمیر پہنچنے پر انہیں کسی قسم کی پریشانی کا سامنا نہ کرنا پڑے۔
انتظامیہ نے تمام خواہشمند یاتریوں کو ہدایت دی ہے کہ وہ جموں و کشمیر روانہ ہونے سے قبل لازمی رجسٹریشن مکمل کریں اور اپنی مقررہ تاریخ کے لیے یاترا رجسٹریشن پرمٹ حاصل کریں۔ بغیر تصدیق شدہ رجسٹریشن کے آنے والے یاتریوں کو یاترا پر جانے کی اجازت نہیں دی جائے گی۔
لیفٹیننٹ گورنر نے یاترا کے سیکورٹی اور لاجسٹک انتظامات کا بھی جائزہ لیا اور تمام متعلقہ محکموں اور سیکورٹی ایجنسیوں کو ہدایت دی کہ وہ باہمی تال میل کے ساتھ کام کریں اور لنگر تنظیموں، خدمات فراہم کرنے والے اداروں، غیر سرکاری تنظیموں اور دیگر متعلقہ فریقوں کے ساتھ مسلسل رابطہ برقرار رکھیں تاکہ یاترا کو محفوظ، منظم، روحانی طور پر بامقصد اور کامیاب بنایا جا سکے۔
اس دوران شری امرناتھ یاترا کے تیسرے قافلے میں شامل۴ ہزار۸۱۲ یاتری ہفتہ کی صبح جموں کے یاتری نواس بیس کیمپ سے مقدس امرناتھ گھپا کے لیے روانہ ہوئے۔
سرکاری حکام کے مطابق یاتریوں کا یہ قافلہ وادی کشمیر کی جانب روانہ ہوا، جہاں سے وہ یاترا کے دونوں روایتی راستوں، بالتل اور پہلگام کے ذریعے مقدس گھپا کا درشن کریں گے۔
حکام نے بتایا کہ مجموعی طور پر۲ ہزار۴۱ یاتری بالتل راستے جبکہ۲ ہزار۷۷۱ یاتری پہلگام راستے سے یاترا انجام دیں گے۔یاتریوں کی نقل و حمل کے لیے۲۵۹ گاڑیوں پر مشتمل قافلہ تشکیل دیا گیا، جس میں سرکاری بسوں اور نجی گاڑیوں دونوں کو شامل کیا گیا تھا۔
یاترا کا قافلہ علی الصبح سخت حفاظتی انتظامات کے درمیان جموں کے بیس کیمپ سے روانہ کیا گیا۔
