۳جولائی کو دونوں منصوبے چالو ہوں گے ‘سنہا کا وزیر اعظم کا شکریہ
ویب ڈیسک
سرینگر؍یکم جولائی
شری امرناتھ یاترا کے آغاز سے قبل جموں،سری نگر قومی شاہراہ پر سڑک رابطے کو مزید محفوظ اور مؤثر بنانے کے لیے دو بڑے بنیادی ڈھانچے کے منصوبے مکمل کر لیے گئے ہیں۔ حکام کے مطابق یہ منصوبے۳ جولائی سے ٹریفک کے لیے کھول دیے جائیں گے۔
ان منصوبوں میں رام بن ضلع میں ڈگڈول اور پنتھیال کو ملانے والی۳ء۵کلومیٹر طویل اے ٹی۳ سرنگ اور رامسو کے قریب۸۱۰میٹر طویل وایاڈکٹ شامل ہیں، جو اس اہم قومی شاہراہ پر آمدورفت کو مزید محفوظ اور آسان بنائیں گے۔
سرکاری ترجمان کے مطابق دونوں منصوبوں پر گاڑیوں کی آمدورفت۳جولائی سے شروع ہوگی۔
دریں اثنا، جموں و کشمیر کے لیفٹیننٹ گورنر منوج سنہا نے ان منصوبوں کی تکمیل پر وزیر اعظم نریندر مودی اور مرکزی وزیر برائے سڑک ٹرانسپورٹ و شاہراہیں نتن گڈکری کا شکریہ ادا کرتے ہوئے کہا کہ یہ ترقی جموں و کشمیر میں محفوظ، تیز رفتار اور قابل اعتماد سڑک رابطے کی سمت ایک اہم پیش رفت ہے۔
واضح رہے کہ لیفٹیننٹ گورنر جمعرات کی صبح جموں کے بھگوتی نگر یاتری نیواس سے شری امرناتھ یاترا کے پہلے قافلے کو روانہ کریں گے۔
یاتری اسی قومی شاہراہ سے سفر کرتے ہوئے پہلگام اور بال تل کے بیس کیمپوں تک پہنچیں گے، جبکہ۵۷ روزہ سالانہ یاترا کا باقاعدہ آغاز اگلے روز دونوں راستوں سے ہوگا۔
لیفٹیننٹ گورنر نے اپنے پیغام میں کہا’’جموں و کشمیر میں شاہراہوں اور سڑک رابطوں میں انقلابی تبدیلی لانے پر معزز وزیر اعظم نریندر مودی جی اور مرکزی وزیر برائے سڑک ٹرانسپورٹ و شاہراہیں نتن گڈکری جی کا تہہ دل سے شکر گزار ہوں۔ رام بن ضلع میں رامسو کے قریب۸۱۰ میٹر طویل وایاڈکٹ اور این ایچ۴۴پر ڈگڈول سے پنتھیال کو ملانے والی۳ء۵ کلومیٹر طویل اے ٹی۳سرنگ کی تکمیل ایک اور تاریخی سنگِ میل ہے‘‘۔
سنہا نے کہا کہ یہ اہم بنیادی ڈھانچے مقامی باشندوں، سیاحوں، مال بردار گاڑیوں اور سیکورٹی فورسز کے لیے ہر موسم میں ہموار آمدورفت کو یقینی بنائیں گے، جبکہ شری امرناتھ جی یاترا۲۰۲۶ کے زائرین کے لیے بھی سفر کو زیادہ محفوظ اور آسان بنائیں گے، کیونکہ ان کے ذریعے لینڈ سلائیڈنگ سے متاثر ہونے والے حصوں کو بائی پاس کیا جا سکے گا۔
لیفٹیننٹ گورنر نے مزید کہا کہ یہ دونوں اہم شاہراہی منصوبے۳ جولائی۲۰۲۶ سے ٹریفک کے لیے کھول دیے جائیں گے۔
