۱۳ لاکھ مضبوط فوج کی جدید کاری اور خود انحصاری کی قیادت کریں گے
نئی دہلی؍۳۰جون
مغربی محاذ پر فوج کی دو آپریشنل کمانڈز کی قیادت کا نادر اعزاز رکھنے والے تجربہ کار فوجی افسر جنرل دھیراج سیٹھ نے منگل کو بھارتی فوج کے نئے سربراہ (چیف آف آرمی اسٹاف) کی حیثیت سے ذمہ داریاں سنبھال لیں۔
جنرل سیٹھ نے ایک اعشاریہ تین ملین(۱۳لاکھ) اہلکاروں پر مشتمل بھارتی فوج کی کمان ایسے وقت سنبھالی ہے جب فوج سرحدی چیلنجوں کا مقابلہ کرتے ہوئے خود انحصاری اور مستقبل کے تقاضوں سے ہم آہنگ جدید فوج بننے کی سمت گامزن ہے۔
جنرل سیٹھ نے جنرل اوپیندر دویدی کی جگہ لی، جو مسلح افواج میں چار دہائیوں سے زائد پر محیط شاندار خدمات انجام دینے کے بعد منگل کو سبکدوش ہو گئے۔
جنرل دھیراج سیٹھ نیشنل ڈیفنس اکیڈمی (این ڈی اے)، کھڑکواسلہ کے سابق طالب علم ہیں۔ انہیں دسمبر۱۹۸۶ میں آرمرڈ کور میں کمیشن ملا تھا۔
بھارتی فوج کے۳۱ ویں چیف آف آرمی اسٹاف بننے سے قبل وہ نائب سربراہِ فوج (وائس چیف آف آرمی اسٹاف) کی حیثیت سے خدمات انجام دے رہے تھے۔
جنرل سیٹھ نے ایسے وقت میں فوج کی کمان سنبھالی ہے جب عالمی جغرافیائی و تزویراتی ماحول مسلسل تبدیلی سے گزر رہا ہے اور جدید ٹیکنالوجی کی ترقی اور جنگ کی بدلتی ہوئی نوعیت کے باعث سلامتی کے شعبے میں چیلنجز مزید پیچیدہ ہوتے جا رہے ہیں۔
دفاعی وزارت کے مطابق آرمی کمانڈر کے عہدے پر ترقی کے بعد انہوں نے جے پور میں قائم جنوبی مغربی کمان اور اس کے بعد جنوبی کمان کے جنرل آفیسر کمانڈنگ اِن چیف کے طور پر خدمات انجام دیں، جس کے باعث انہیں مغربی محاذ پر فوج کی دو آپریشنل کمانڈز کی قیادت کرنے کا منفرد اعزاز حاصل ہوا۔
تقریباً چار دہائیوں پر محیط اپنے فوجی کیریئر کے دوران جنرل سیٹھ نے آپریشنل، تزویراتی، صلاحیت سازی اور ادارہ جاتی شعبوں میں وسیع تجربہ حاصل کیا اور بھارتی فوج کی جنگی صلاحیت میں اضافے اور اس کی طویل مدتی تبدیلی میں نمایاں کردار ادا کیا۔
آرمی ہیڈکوارٹرز میں اسٹریٹجک پلاننگ اور صلاحیت سازی سے متعلق اہم ذمہ داریوں کے دوران انہوں نے فوج کی جدیدکاری، مستقبل کی صلاحیتوں کے روڈ میپ اور طویل مدتی فورس اسٹرکچر کی تشکیل میں اہم کردار ادا کیا۔
یکم اپریل کو نائب سربراہِ فوج مقرر ہونے سے قبل وہ پونے میں قائم جنوبی کمان کے سربراہ تھے۔ ان کی قیادت میں گزشتہ سال آپریشن سندور کے دوران اس اہم کمان نے اعلیٰ سطح کی آپریشنل تیاری برقرار رکھی۔
تقریباً چالیس برسوں پر محیط فوجی خدمات کے دوران انہوں نے مختلف جغرافیائی خطوں اور متنوع جنگی حالات میں نمایاں آپریشنل تجربہ حاصل کیا، جس میں انسدادِ شورش کارروائیوں کا وسیع تجربہ بھی شامل ہے۔
جنرل سیٹھ نے ہر سطح پر مختلف آپریشنل ماحول میں کمان کی ذمہ داریاں انجام دی ہیں۔
ان کی کمانڈ اسائنمنٹس میں صحرائی سیکٹر میں ایک آرمرڈ رجمنٹ، مغربی محاذ پر ایک آرمرڈ بریگیڈ اور جموں و کشمیر میں انسدادِ شورش فورس کی قیادت شامل ہے۔
لیفٹیننٹ جنرل کی حیثیت سے انہوں نے بھارتی فوج کی ممتاز اسٹرائیک فارمیشنز میں شمار ہونے والے سدرشن چکر کور کی کمان بھی سنبھالی۔ بعد ازاں وہ دہلی ایریا کے جنرل آفیسر کمانڈنگ مقرر ہوئے، جہاں انہوں نے اہم قومی اور بین الاقوامی فوجی سرگرمیوں اور رسمی فوجی ذمہ داریوں کی نگرانی کی۔
انہوں نے متعدد اہم اسٹاف اور تزویراتی عہدوں پر بھی خدمات انجام دیں، جنہوں نے آپریشنل منصوبہ بندی، فورس مینجمنٹ اور صلاحیت سازی پر نمایاں اثرات مرتب کیے۔
دفاعی وزارت کے مطابق جنرل سیٹھ کی خدمات آپریشنل ضروریات کو ابھرتی ہوئی ٹیکنالوجی اور مستقبل کے میدانِ جنگ کی ضروریات سے ہم آہنگ کرنے میں نہایت اہم ثابت ہوئی ہیں۔
دفاعی وزارت نے کہا کہ جنرل سیٹھ ایک ممتاز فوجی پیشہ ور ہیں، جنہوں نے فوجی تربیت کے مختلف کورسز میں مسلسل نمایاں کارکردگی کا مظاہرہ کرتے ہوئے اعلیٰ پوزیشنیں حاصل کیں۔
وہ ہائر کمانڈ کورس اور نیشنل ڈیفنس کالج کے گریجویٹ ہیں۔ اس کے علاوہ انہوں نے پیرس میں منعقد ہونے والا ممتاز کمانڈ اینڈ اسٹاف کورس بھی مکمل کیا، جو ان کے وسیع تزویراتی وژن اور جدید عسکری امور پر گہری سمجھ کی عکاسی کرتا ہے۔
ایجنسیاں
