نئی دہلی، 29 جون (یو این آئی) راجیہ سبھا کے چیئرمین سی پی رادھا کرشنن نے پیر کو کانگریس صدر ملکارجن کھرگے سمیت راجیہ سبھا کے دوبارہ منتخب اور نو منتخب آٹھ ارکان کو راجیہ سبھا کی رکنیت کا حلف دلایا۔
راجیہ سبھا سکریٹریٹ کی طرف سے جاری کردہ ریلیز کے مطابق، مسٹر رادھا کرشنن نے پارلیمنٹ ہاؤس میں منعقدہ سادہ تقاریب میں منتخب ارکان کو رکنیت کا حلف دلایا۔ کرناٹک سے منتخب ہونے والے مسٹر کھرگے کے علاوہ آج حلف لینے والے سات ارکان میں گجرات سے بھارتیہ جنتا پارٹی (بی جے پی) کے جتیندر میگھ جی بھائی کنجاریا اور مسٹر مان سنگھ میرامن پرمار، کرناٹک سے بی جے پی کے ایم ناگراجا، مدھیہ پردیش سے بی جے پی کے مسٹر ترون چگ، مہاراشٹر سے منتخب ہوئے نیشنلسٹ کانگریس پارٹی (این سی پی) کے راجیندر ہیرا لال جین، منی پور سے بی جے پی کی محترمہ ادھیکاری مایوم شاردا دیوی عرف میموم شاردا دیوی اور راجستھان سے منتخب بی جے پی کی ڈاکٹر الکا سنگھ شامل ہیں۔
ان سات میں سے چار ارکان نے ہندی میں، ایک نے کنڑ میں، ایک نے پنجابی میں اور ایک نے منی پوری زبان میں حلف لیا۔ اس موقع پر راجیہ سبھا کے ڈپٹی چیئرمین ہری ونش، ایوان کے رہنما اور مرکزی وزیر جگت پرکاش نڈّا، پارلیمانی امور اور اقلیتی امور کے وزیر کرن ریجیجو، قانون اور انصاف کے وزیرِ مملکت ارجن رام میگھوال اور راجیہ سبھا کے ارکان جے رام رمیش اور پرفل پٹیل موجود تھے۔ راجیہ سبھا کے جنرل سکریٹری پی سی مودی اور سکریٹریٹ کے دیگر اعلیٰ حکام بھی اس موقع پر موجود تھے۔
مسٹر کھرگے نے چیئرمین کے چیمبر میں الگ سے منعقدہ تقریب میں حلف لینے کے بعد سوشل میڈیا پر ایک پوسٹ میں کہا کہ دوبارہ راجیہ سبھا کا حلف لینا ان کے لیے فخر اور بڑی ذمہ داری کا موضوع ہے۔ انہوں نے کہا کہ اس باوقار ایوان میں قائدِ حزبِ اختلاف (اپوزیشن لیڈر) کے طور پر خدمت جاری رکھنا ان کے لیے اعزاز کی بات ہے۔ مسٹر کھرگے نے راجیہ سبھا کے چیئرمین اور ڈپٹی چیئرمین ہری ونش کے تعاون اور حمایت کے لیے تشکر کا اظہار کیا۔ انہوں نے کانگریس کی لیڈر محترمہ سونیا گاندھی، لوک سبھا میں قائدِ حزبِ اختلاف راہل گاندھی، کانگریس ممبرانِ پارلیمنٹ، پارٹی قیادت، کارکنوں اور حامیوں کا بھی شکریہ ادا کرتے ہوئے کہا کہ ان کے اٹوٹ یقین اور حوصلہ افزائی نے عوامی زندگی اور پارلیمانی سفر میں ہمیشہ ان کا ساتھ دیا ہے۔ مسٹر کھرگے کی حلف برداری کے موقع پر کانگریس کی سینئر لیڈر محترمہ سونیا گاندھی، لوک سبھا رکن محترمہ پرینکا گاندھی واڈرا اور کے سی وینوگوپال بھی موجود تھے۔
