سولر قرض، فائل پاس کرنے کے عوض رشوت لینے کے الزام میں پی این بی مینیجر گرفتار

نئی دہلی، 26 جون (یو این آئی) مرکزی تحقیقاتی بیورو (سی بی آئی) نے آگرہ میں تعینات پنجاب نیشنل بینک (پی این بی) کے ایک مینیجر کو تقریباً 19 سولر پینل کے لیئے قرض کی فائلوں کو آگے بڑھانے اور منظور کرنے کے عوض مبینہ طور پر رشوت مانگنے کے الزام میں گرفتار کیا ہے۔
سی بی آئی نے جمعہ کو بتایا کہ ایک نجی کمپنی کے ملازم کی شکایت کی بنیاد پر 25 جون کو ملزم مینیجر پروین یادو کے خلاف معاملہ درج کیا تھا۔ سی بی آئی کے مطابق، یادو نے قریب 19 سولر پینل قرض کی فائلوں کو پروسیس اور کلیئر کرنے کے لیے مبینہ طور پر فی فائل 7,000 روپے کی رشوت کا مطالبہ کیا تھا۔ بعد میں بات چیت کے دوران، وہ ان 19 قرض فائلوں کو پاس کرنے کے لیے کل 52,000 روپے کی رشوت لینے پر راضی ہو گیا، جنہیں بینک پہلے ہی باقاعدہ طور پر منظور کر چکا تھا۔
سی بی آئی نے جال بچھا کر ملزم مینیجر کو شکایت کنندہ سے رشوت کی ایک قسط کے طور پر 30,000 روپے مانگتے اور قبول کرتے ہوئے رنگے ہاتھوں دبوچ لیا۔ ملزم کو جمعرات کو گرفتار کیا گیا تھا اور جمعہ کو غازی آباد کی مجاز عدالت کے سامنے پیش کیا جا رہا ہے۔ معاملے کی مزید جانچ جاری ہے۔