ایجنسیاں
جموں؍۲۵ جون
جموں و کشمیر انتظامی سروس (جے کے اے ایس) کے سینئر افسر رومین شیخ جمعرات کی صبح جموں کے علاقے باتھنڈی میں واقع اپنی رہائش گاہ پر دل کا دورہ پڑنے کے باعث انتقال کر گئے۔
سرکاری ذرائع نے اس افسوسناک خبر کی تصدیق کی ہے۔
رومین شیخ، جو۲۰۰۴ بیچ کے جے کے اے ایس افسر تھے اور ضلع پونچھ کے سرنکوٹ علاقے کے گاؤں سالیاں کے رہنے والے تھے، اپنی وفات کے وقت محکمہ ہینڈلوم، کشمیر ڈویژن میں جوائنٹ ڈائریکٹر کے عہدے پر خدمات انجام دے رہے تھے۔
سرکاری حکام کے مطابق انہیں اپنی رہائش گاہ پر اچانک شدید دل کا دورہ پڑا، جس کے نتیجے میں ان کا انتقال ہو گیا۔ پولیس نے واقعے کا نوٹس لیتے ہوئے تمام ضروری قانونی کارروائی مکمل کر لی ہے۔
خاندانی ذرائع کے مطابق مرحوم کی نمازِ جنازہ آج شام ۶بجے باتھنڈی، جموں میں پڑھئی گئی جس کے بعد انہیں سپرد خاک کیا گیا ۔
سینئر انتظامی افسر کی اچانک وفات سے جموں و کشمیر کے سرکاری اور انتظامی حلقوں میں گہرے رنج و غم کی لہر دوڑ گئی ہے۔ ان کے ساتھی افسران، سرکاری اہلکاروں اور خیر خواہوں نے ان کے انتقال پر گہرے دکھ کا اظہار کرتے ہوئے سوگوار خاندان سے تعزیت کی ہے اور مرحوم کی مغفرت، درجات کی بلندی اور لواحقین کے لیے صبرِ جمیل کی دعا کی ہے۔
دریں اثنا، جموں و کشمیر کے لیفٹیننٹ گورنر منوج سنہا نے بھی جے کے اے ایس افسر رومین احمد کے اچانک انتقال پر گہرے رنج و غم کا اظہار کیا ہے۔
اپنے تعزیتی پیغام میں لیفٹیننٹ گورنر نے کہا’’رومین احمد کے ناگہانی انتقال کی خبر سن کر انتہائی دکھ ہوا۔ انہوں نے ایک مخلص اور فرض شناس افسر کی حیثیت سے جموں و کشمیر کے عوام کی پوری لگن، دیانت داری اور عزم کے ساتھ خدمت کی۔ اس کٹھن گھڑی میں میری دلی ہمدردیاں سوگوار خاندان کے ساتھ ہیں۔ اللہ تعالیٰ مرحوم کی مغفرت فرمائے، انہیں جوارِ رحمت میں جگہ عطا کرے اور پسماندگان کو یہ ناقابلِ تلافی صدمہ برداشت کرنے کی ہمت عطا فرمائے۔ آمین۔‘‘
