ایجنسیاں
سرینگر؍۲۲ جون
جموں و کشمیر کے ڈائریکٹر جنرل آف پولیس (ڈی جی پی) نلین پربھات نے پیر کے روز ایک اعلیٰ سطحی سیکورٹی جائزہ اجلاس کی صدارت کرتے ہوئے جنوبی کشمیر کی موجودہ سیکورٹی صورتحال اور آئندہ شری امرناتھ جی یاترا کے لیے کیے جا رہے انتظامات کا تفصیلی جائزہ لیا۔
اجلاس میں جنوبی کشمیر میں تعینات مختلف سیکورٹی اداروں کے سینئر افسران نے شرکت کی، جن میں فوج کی وکٹر فورس، سی آر پی ایف، بی ایس ایف، آئی ٹی بی پی اور جموں و کشمیر پولیس کے اعلیٰ حکام شامل تھے۔
متعلقہ اضلاع کے سینئر سپرنٹنڈنٹس آف پولیس (ایس ایس پیز) نے بھی اجلاس میں شرکت کرتے ہوئے موجودہ سیکورٹی ماحول، انسدادِ شورش اقدامات اور سالانہ یاترا کے لیے کیے جا رہے انتظامات کے بارے میں تفصیلی بریفنگ دی۔
اجلاس کے دوران افسران نے ڈی جی پی کو جاری انسدادِ دہشت گردی کارروائیوں، ایریا ڈومینیشن منصوبوں، انٹیلی جنس رابطہ کاری اور یاترا روٹس سمیت دیگر حساس مقامات پر قائم کیے جا رہے کثیر سطحی سیکورٹی نظام کے بارے میں آگاہ کیا، جس کا مقصد یاتریوں کی حفاظت کو یقینی بنانا ہے۔
تمام سیکورٹی ایجنسیوں کی عملی تیاریوں کا جائزہ لیتے ہوئے ڈی جی پی نلین پربھات نے مختلف فورسز کے درمیان قریبی تال میل، انٹیلی جنس معلومات کے تبادلے اور مشترکہ آپریشنل منصوبہ بندی کی اہمیت پر زور دیا۔
انہوں نے افسران کو ہدایت دی کہ وہ مکمل چوکسی برقرار رکھیں اور کسی بھی ممکنہ خطرے کا مؤثر انداز میں مقابلہ کرنے کے لیے مضبوط سیکورٹی گرڈ کو یقینی بنائیں۔
ڈی جی پی نے کہا کہ یاتریوں کی حفاظت اور سلامتی اولین ترجیح ہے اور اس مقصد کے لیے نگرانی کے نظام کو مزید مؤثر بنایا جائے، سیکورٹی اہلکاروں کی مناسب تعیناتی کو یقینی بنایا جائے اور تمام متعلقہ اداروں کے درمیان مسلسل رابطہ برقرار رکھا جائے تاکہ شری امرناتھ جی یاتراکا پُرامن اور کامیاب انعقاد ممکن بنایا جا سکے۔
انہوں نے خطے میں امن و استحکام برقرار رکھنے کے لیے سیکورٹی فورسز کی خدمات کو سراہتے ہوئے تمام ایجنسیوں پر زور دیا کہ وہ باہمی ہم آہنگی اور مربوط انداز میں کام جاری رکھیں تاکہ سالانہ یاترا کے دوران محفوظ ماحول کو یقینی بنایا جا سکے۔
