(ایجنسیاں)
بارہمولہ؍۲۰ جون
ضلع مجسٹریٹ بارہمولہ نے نیٹ (یو جی)کے دوبارہ امتحان کے منصفانہ، شفاف اور پرامن انعقاد کو یقینی بنانے کے لیے ضلع کے۱۱ ؍امتحانی مراکز کے اطراف بھارتیہ ناگرک سرکشا سنہتا (بی این ایس ایس)۲۰۲۳ کی دفعہ۱۶۳ کے تحت پابندیاں نافذ کر دی ہیں۔
ضلع مجسٹریٹ بارہمولہ سید فخرالدین حمید (آئی اے ایس) کی جانب سے جاری حکم نامے کے مطابق یہ پابندیاں تمام نامزد امتحانی مراکز کے گرد۲۰۰ میٹر کے دائرے میں۲۱ جون کو صبح۱۰ بجے سے امتحان کے اختتام تک نافذ رہیں گی۔
حکم نامے میں کہا گیا ہے کہ نیشنل ٹیسٹنگ ایجنسی (این ٹی اے)۲۱ جون کو دوپہر۲ بجے سے شام۵ بجے تک نیٹ (یو جی)۲۰۲۶ کا دوبارہ امتحان منعقد کرے گی، جبکہ معذور امیدواروں کے لیے اضافی ایک گھنٹے کی مہلت بھی دی جائے گی۔
حکم کے مطابق صرف وہی امیدوار امتحانی مراکز میں داخل ہو سکیں گے جو درست ایڈمٹ کارڈ اور شناختی دستاویزات اپنے ساتھ لائیں گے۔ امتحانی عملہ، بشمول سپرنٹنڈنٹس، نگران، مبصرین، تلاشی نگرانی عملہ، ویڈیو گرافرز اور دیگر مجاز اہلکاروں کو بھی فوٹو شناختی کارڈ اور جہاں ضروری ہو بائیومیٹرک تصدیق کے بعد ہی داخلے کی اجازت ہوگی۔
انتظامیہ نے امتحانی مراکز کے۲۰۰ میٹر کے دائرے میں کسی بھی غیر مجاز شخص کے داخلے پر پابندی عائد کر دی ہے۔ اسی طرح امیدواروں کو موبائل فون، الیکٹرانک آلات، کیلکولیٹر، کتابیں، نوٹس یا نقل میں معاون کسی بھی قسم کا مواد ساتھ لانے کی اجازت نہیں ہوگی۔
حکم نامے کے مطابق امتحانی مراکز کے اطراف پانچ سے زائد افراد کے اجتماع پر بھی پابندی ہوگی، جبکہ امتحان کے دن دوپہر۱۲ بجے سے شام۶ بجے تک لاؤڈ اسپیکرز اور عوامی خطاب کے نظام کے استعمال پر بھی روک رہے گی۔
حکام نے بتایا کہ یہ پابندیاں بیرونی مداخلت کو روکنے اور امتحان کو منصفانہ، شفاف اور بلا رکاوٹ طریقے سے منعقد کرانے کے مقصد سے نافذ کی گئی ہیں۔تاہم قانون نافذ کرنے والے اداروں، مجسٹریٹس اور امتحان کے انعقاد سے وابستہ سرکاری اہلکاروں کو ان پابندیوں سے مستثنیٰ رکھا گیا ہے۔
انتظامیہ نے خبردار کیا ہے کہ حکم نامے کی خلاف ورزی کرنے والوں کے خلاف بھارتیہ نیائے سنہتا (بی این ایس)۲۰۲۳ کی دفعہ۲۲۳ کے تحت قانونی کارروائی عمل میں لائی جائے گی۔
