ایجنسیز
سرینگر؍۱۸ جون
جموں و کشمیر کے ڈائریکٹر جنرل آف پولیس نلین پربھات نے جمعرات کے روز امرناتھ یاترا کے دونوں راستوں پر تعیناتی کیلئے۴۵ماؤنٹین ریسکیو ٹیموں کو جھنڈی دکھا کر روانہ کیا۔
یہ۴۵ ٹیمیں ‘ جن میں جموں و کشمیر پولیس، اسٹیٹ ڈیزاسٹر ریسپانس فورس (ایس ڈی آر ایف)، نیشنل ڈیزاسٹر ریسپانس فورس (این ڈی آر ایف)، سینٹرل ریزرو پولیس فورس (سی آر پی ایف)، سشستر سیما بل (ایس ایس بی) اور بارڈر سکیورٹی فورس (بی ایس ایف) کے اہلکار شامل ہیں، جنوبی کشمیر کے ہمالیائی سلسلے میں واقع مقدس امرناتھ غار کے دونوں راستوں پر۲۱مقامات پر تعینات کی جائیں گی۔
ایس ڈی آر ایف کے ڈائریکٹر‘ امتیاز حسین میر نے نامہ نگاروں سے بات کرتے ہوئے کہا، ’’ہر سال کی طرح اس سال بھی ہماری ٹیمیں وہاں تعینات رہیں گی تاکہ یاتریوں کی مدد کی جا سکے۔ یہ ٹیمیں زائرین کو ہر ممکن سہولت فراہم کریں گی اور خدا نخواستہ اگر کوئی حادثہ یا آفت پیش آتی ہے تو فوری طور پر کارروائی کرتے ہوئے صورتحال پر قابو پائیں گی۔‘‘
میر نے کہا کہ سالانہ امرناتھ یاترا ملک کی ایک نہایت مقدس مذہبی زیارت ہے۔
میر نے مزید کہا، ’’اس یاترا کے انعقاد میں جموں و کشمیر پولیس کا کردار نہایت اہم ہے، جبکہ دیگر سکیورٹی فورسز بھی بھرپور تعاون فراہم کرتی ہیں۔ یہ ماؤنٹین ریسکیو ٹیمیں خصوصی تربیت یافتہ ہیں اور ان میں سے بیشتر اہلکار پہلے بھی یاترا کے دوران اپنی خدمات انجام دے چکے ہیں۔ یہ ٹیمیں ملک کے مختلف حصوں سے آنے والے یاتریوں کو بالخصوص ہنگامی حالات میں ہر ممکن امداد فراہم کرتی ہیں۔‘‘
انہوں نے بتایا کہ اس سال تعیناتی کے لیے اضافی تیاریاں کی گئی ہیں اور ضروری سازوسامان میں بھی اضافہ کیا گیا ہے۔
ان کا کہنا تھا، ’’ہم ماؤنٹین ریسکیو ٹیموں کو بہتر سہولیات فراہم کرنے کی کوشش کر رہے ہیں تاکہ وہ یاتریوں کو مزید بہتر خدمات مہیا کر سکیں۔ ہمیں امید ہے کہ اس سال کی یاترا کامیابی کے ساتھ مکمل ہوگی اور ہم اپنی اس ذمہ داری کو پوری تندہی سے نبھائیں گے۔‘‘
دریں اثنا، وادی کشمیر کے مختلف اضلاع میں فرضی مشقیں بھی منعقد کی گئیں کیونکہ سکیورٹی اداروں نے یاترا کے پرامن اور محفوظ انعقاد کو یقینی بنانے کے لیے اپنے اقدامات میں مزید تیزی پیدا کر دی ہے۔
حکام کے مطابق، ’’سالانہ امرناتھ یاترا کے محفوظ اور ہموار انعقاد کے لیے سکیورٹی تیاریوں، ہنگامی ردعمل کے نظام اور مختلف اداروں کے درمیان تال میل کا جائزہ لینے اور اسے مزید مضبوط بنانے کے مقصد سے وادی بھر میں جامع فرضی مشقیں انجام دی جا رہی ہیں۔‘‘
جمعرات کے روز جنوبی کشمیر کے پلوامہ اور کولگام اضلاع میں بھی ایسی مشقیں منعقد کی گئیں۔
واضح رہے کہ اس سال امرناتھ یاترا۳ جولائی سے شروع ہوگی اور۲۸؍ اگست کو اختتام پذیر ہوگی۔
