(ڈی آئی پی آر)
سرینگر؍۱۶ جون
وزیر اعلیٰ عمر عبداللہ نے آج سری نگر میں نکاسی آب اور فضلہ پانی کے انتظام کو بہتر بنانے کے لیے دو اہم سیوریج منصوبوں کا سنگِ بنیاد رکھا، جن پر مجموعی طور پر۲۶؍۵۴ کروڑ روپے لاگت آئے گی۔
منصوبوں میں براری نمبل میں موجود۱۷ء۰۸؍ایم ایل ڈی (ملین لیٹر یومیہ) صلاحیت کے سیویج ٹریٹمنٹ پلانٹ (ایس ٹی پی) کی توسیع اور اپ گریڈیشن شامل ہے، جس پر۱۲ کروڑ روپے خرچ کیے جائیں گے۔ اس کے علاوہ چھتہ بل میں۲ء۵؍ایم ایل ڈی صلاحیت کے نئے سیویج ٹریٹمنٹ پلانٹ کی تعمیر اور۳ء۹۵ کلومیٹر طویل سیور لائن بچھانے کا منصوبہ بھی شامل ہے، جس کی تخمینی لاگت۱۴ء۵۴کروڑ روپے ہے۔
یہ منصوبے محکمہ ہاؤسنگ و شہری ترقی کے تحت اربن انوائرمنٹل انجینئرنگ ڈپارٹمنٹ (یو ای ای ڈی) کشمیر کی جانب سے کیپیکس پروگرام کے تحت عمل میں لائے جا رہے ہیں۔
اس موقع پر وزیر اعلیٰ عمر عبداللہ نے کہا کہ شہری بنیادی ڈھانچے، بالخصوص سیوریج اور فضلہ پانی کے انتظامی نظام کو مضبوط بنانا حکومت کی ترجیحات میں شامل ہے تاکہ پائیدار ترقی اور شہریوں کے معیارِ زندگی کو بہتر بنایا جا سکے۔
عمرعبداللہ نے کہا کہ ان منصوبوں سے فضلہ پانی کی صفائی کی صلاحیت میں نمایاں اضافہ ہوگا، ماحولیاتی حالات بہتر ہوں گے اور سری نگر اور اس کے اطراف آبی ذخائر کے تحفظ میں مدد ملے گی۔
براری نمبل منصوبے کے تحت موجودہ سیویج ٹریٹمنٹ پلانٹ کو جدید خطوط پر استوار کیا جائے گا تاکہ بڑھتی ہوئی ضروریات کو مؤثر طریقے سے پورا کیا جا سکے۔ جبکہ چھتہ بل منصوبے میں نئے ایس ٹی پی کے ساتھ وسیع سیور نیٹ ورک قائم کیا جائے گا، جس سے علاقے میں صفائی ستھرائی کی سہولیات بہتر ہوں گی اور بغیر صفائی کے فضلہ پانی کو آبی گزرگاہوں میں شامل ہونے سے روکا جا سکے گا۔
سنگِ بنیاد رکھنے کی تقریبات میں وزیر اعلیٰ کے مشیر ناصر اسلم وانی، رکن اسمبلی حبہ کدل شمیم فردوس، رکن اسمبلی خانیار علی محمد ساگر، رکن اسمبلی زڈی بل تنویر صادق، رکن اسمبلی حضرت بل سلمان علی ساگر، کمشنر سیکریٹری ہاؤسنگ و شہری ترقی مندیپ کور، محکمہ کے سینئر افسران اور مقامی باشندوں نے شرکت کی۔
حکام کے مطابق یہ منصوبے سری نگر کے شہری بنیادی ڈھانچے کو مضبوط بنانے اور ماحول دوست فضلہ پانی انتظامی نظام کو فروغ دینے میں اہم کردار ادا کریں گے۔
