جون میں ہیٹ ویو بڑھنے کا انتباہ‘کہا زرعی پیداوار، پینے کے پانی کی فراہمی، پن بجلی کی پیداوار کیلئے مشکلات پیدا ہو سکتے ہیں
نئی دہلی؍۳۰مئی
محکمہ موسمیات ہند (آئی ایم ڈی) نے پیش گوئی کی ہے کہ رواں سال جون تا ستمبر کے دوران جنوب مغربی مانسون کی بارشیں ملک بھر میں معمول سے کم رہنے کا امکان ہے، جبکہ جون کے مہینے میں کئی ریاستوں میں شدید گرمی کی لہر (ہیٹ ویو) کے دن معمول سے زیادہ رہنے کی وارننگ بھی جاری کی گئی ہے۔
وزارتِ ارضیاتی سائنسز کی جانب سے جاری تازہ طویل مدتی موسمی پیش گوئی کے مطابق۲۰۲۶کے مانسون سیزن کے دوران ملک بھر میں بارشیں طویل مدتی اوسط(ایل پی اے) کے تقریباً۹۰فیصد رہنے کا امکان ہے، جس میں۴فیصد کمی یا اضافہ ممکن ہے۔
محکمہ کے مطابق۱۹۷۱سے۲۰۲۰کے اعداد و شمار کی بنیاد پر مانسون سیزن کی طویل مدتی اوسط بارش۸۷سینٹی میٹر ہے۔پیش گوئی میں کہا گیا ہے کہ ملک میں مانسون کے دوران معمول سے کم یا ناکافی بارشوں کے۸۴فیصد امکانات ہیں۔
آئی ایم ڈی کے مطابق شمال مغربی اور شمال مشرقی ہندوستان کے بعض علاقوں، جزیرہ نما ہندوستان کے مشرقی حصوں اور ملحقہ مشرقی وسطیٰ علاقوں کو چھوڑ کر ملک کے بیشتر حصوں میں معمول سے کم بارش ہونے کا امکان ہے، جبکہ مذکورہ علاقوں میں معمول یا معمول سے زیادہ بارشیں ہو سکتی ہیں۔
محکمہ موسمیات نے خبردار کیا ہے کہ معمول سے کم بارشیں زرعی پیداوار، پینے کے پانی کی فراہمی، پن بجلی کی پیداوار اور ماحولیاتی نظام کے استحکام کے لیے مشکلات پیدا کر سکتی ہیں۔ اس کے علاوہ کئی علاقوں میں خشک سالی اور گرمی کے دباؤ (ہیٹ اسٹریس) کے خطرات بھی بڑھ سکتے ہیں۔
جون۲۰۲۶کے بارے میں پیش گوئی کرتے ہوئے محکمہ نے کہا کہ ملک بھر میں بارشیں بھی معمول سے کم رہیں گی اور یہ طویل مدتی اوسط کے۹۲فیصد سے کم ہونے کا امکان ہے۔تاہم شمال مغربی اور شمال مشرقی ہندوستان کے بعض علاقوں اور جنوبی جزیرہ نما ہندوستان کے کئی حصوں میں معمول یا معمول سے زیادہ بارش متوقع ہے۔
آئی ایم ڈی نے مزید کہا کہ جون کے دوران اتر پردیش، ہریانہ، پنجاب، بہار، اڈیشہ، چھتیس گڑھ، گجرات اور آندھرا پردیش کے بیشتر علاقوں میں ہیٹ ویو کے دن معمول سے زیادہ رہنے کا امکان ہے۔ اسی طرح مہاراشٹر، تلنگانہ، ہماچل پردیش اور تمل ناڈو کے بعض علاقوں میں بھی گرمی کی شدید لہر معمول سے زیادہ دیکھی جا سکتی ہے۔
البتہ راجستھان اور جھارکھنڈ میں جون کے دوران ہیٹ ویو کے دن معمول سے کم رہنے کی توقع ظاہر کی گئی ہے۔وزارتِ ارضیاتی سائنسز کے مطابق جون کے دوران ملک کے بیشتر حصوں میں زیادہ سے زیادہ اور کم سے کم درجہ حرارت معمول سے بلند رہنے کا امکان ہے۔
آئی ایم ڈی نے بتایا کہ بحرالکاہل کے خطِ استوا کے قریب اس وقت غیر جانبدار ایل نینو-سدرن اوسیلیشن کی صورتحال موجود ہے، جو بتدریج ایل نینو کی جانب بڑھ رہی ہے اور امکان ہے کہ مانسون سیزن کے دوران ایل نینو کی کیفیت پیدا ہو جائے گی۔
اسی دوران انڈین اوشن ڈائی پول کی غیر جانبدار صورتحال مانسون کے پورے عرصے میں برقرار رہنے کی توقع ہے۔
محکمہ موسمیات نے ریاستی حکومتوں اور ضلعی انتظامیہ کو ممکنہ ہیٹ ویو سے نمٹنے کے لیے پیشگی تیاریوں کی ہدایت دیتے ہوئے محفوظ پینے کے پانی کی دستیابی، کولنگ شیلٹرز کو فعال رکھنے اور صحت کی نگرانی کے نظام کو مزید مضبوط بنانے پر زور دیا ہے۔
محکمہ نے عوام کو مشورہ دیا ہے کہ وہ پانی کا زیادہ استعمال کریں، دوپہر کے اوقات میں غیر ضروری طور پر دھوپ میں نکلنے سے گریز کریں اور بچوں، بزرگوں اور کھلے آسمان تلے کام کرنے والے افراد کا خصوصی خیال رکھیں۔
آئی ایم ڈی کے مطابق جولائی۲۰۲۶کی بارشوں سے متعلق پیش گوئی جون کے آخری ہفتے میں جاری کی جائے گی۔
۔۔۔۔۔
