کانگریس جلد ہی دو حصوں میں تقسیم ہوجائے گی: بی جے پی

نئی دہلی، 25 مئی (یواین آئی) بھارتیہ جنتا پارٹی (بی جے پی) نے راہل گاندھی کو ہندوستانی سیاست کا ‘بھسماسور قرار دیتے ہوئے دعویٰ کیا ہے کہ انڈین نیشنل کانگریس جلد ہی دو حصوں میں تقسیم ہو جائے گی۔
گورو بھاٹیہ نے پیر کے روز پارٹی ہیڈکوارٹر میں پریس کانفرنس کے دوران کہا کہ یہ افسوسناک بات ہے کہ قائدِ حزبِ اختلاف ایسے وقت میں اس قسم کے بیانات دے رہے ہیں جب ملک مضبوطی کے ساتھ چیلنجز کا سامنا کر رہا ہے۔ انہوں نے کہاکہ جہاں اس عالمی بحران کے دوران کئی ممالک کی معیشتیں کمزور ہوئی ہیں، وہیں دوسری جانب نریندر مودی کی قیادت میں ہندوستان اس عالمی چیلنج کا مضبوطی سے سامنا کر رہا ہے۔ ہماری معیشت مضبوط ہے۔
انہوں نے کہا کہ ایک ٹول کٹ ماڈل، جو تباہ کن، افراتفری پھیلانے والا، غیر پختہ اور احمقانہ ہے اور جو راہل گاندھی کی سوچ کی پیداوار ہے، ایک بار پھر سامنے آیا ہے، جب انہوں نے دعویٰ کیا کہ مرکز کی مودی حکومت ایک سال کے اندر گر جائے گی۔
گورو بھاٹیہ نے راہل گاندھی پر افراتفری پھیلانے کا الزام عائد کرتے ہوئے کہاکہ اگر آپ کا مقصد افراتفری پھیلانا ہے، تو ہمارا عزم ہندوستان کو مزید مضبوط بنانا ہے۔ آپ اپنی پوری طاقت لگا دیں، ہم نے ہندوستان کو مزید آگے لے جانے کا فیصلہ کر لیا ہے۔
بی جے پی ترجمان نے دعویٰ کیا کہ یہ حکومت، یعنی قومی جمہوری اتحاد (این ڈی اے) حکومت، مستحکم اور مضبوط ہے۔ انہوں نے یہ بھی دعویٰ کیا کہ جلد ہی انڈین نیشنل کانگریس دو حصوں میں تقسیم ہو جائے گی اور پارٹی کے کئی رہنما بھی قائدِ حزبِ اختلاف کے ایسے ہندوستان مخالف اور بے چینی پھیلانے والے بیانات کے حامی نہیں ہیں۔
انہوں نے الزام لگایا کہ کانگریس یہ غلط معلومات پھیلا رہی ہے کہ ہندوستان امریکی دباؤ کے باعث روس سے خام تیل درآمد نہیں کر رہا۔ انہوں نے کہاکہ ہم ملک کے مفاد میں ہی فیصلے کریں گے، یہ بات بالکل واضح ہے۔ ہم کسی کے دباؤ میں کام نہیں کرتے۔
انہوں نے کہا کہ قومی جمہوری اتحاد حکومت کے دوران گزشتہ چار پانچ برسوں میں روس سے 30 فیصد تک خام تیل درآمد کیا گیا، جبکہ متحدہ ترقی پسند اتحاد (یو پی اے) حکومت کے دوران یہ شرح صرف ایک فیصد تھی۔ انہوں نے کہاکہ سال 2026 میں ہم نے روس سے سب سے زیادہ خام تیل درآمد کیا۔ روسی تیل کی درآمد سے ملک کو تقریباً 20 سے 25 ارب ڈالر کی بچت ہوئی ہے۔ جب ہم نے روسی تیل درآمد کرنے کا فیصلہ کیا تھا تو اسی راہل گاندھی اور کانگریس نے اس فیصلے کی مخالفت کی تھی۔”