ایران نے میمز اور طنزیہ پوسٹس سے امریکی بیانیہ چیلنج کردیا

تہران، 23 مئی (یو این آئی) دنیا بھر میں ایرانی سفارت خانوں سے منسلک سوشل میڈیا اکاؤنٹس نے امریکی صدر ڈونلڈ ٹرمپ کے خلاف طنزیہ پوسٹس کا سلسلہ تیز کر دیا۔
ازبکستان کے دارالحکومت تاشقند میں ایرانی سفارت خانے کے اکاؤنٹ نے ایک تصویر شیئر کی ہے جس میں اسرائیلی وزیرِ اعظم بنیامین نیتن یاہو کو ٹرمپ کے دماغ کے اندر بیٹھا دکھایا گیا ہے، جو ان کے فیصلوں کو کنٹرول کر رہا ہے۔ اس پوسٹ کو امریکا کی پالیسی سازی پر اسرائیلی اثر و رسوخ کی علامت کے طور پر دیکھا جا رہا ہے۔
دوسری جانب روس میں ایرانی سفارت خانے نے ایک ویڈیو شیئر کی ہے جس میں امریکی صدر ٹرمپ کے ڈبلیو ڈبلیو ای ریسلنگ شو کے مناظر کو ایرانی صدر مسعود پزشکیان کے سرجن ہونے کے پسِ منظر سے مقابلہ کرتے ہوئے دکھایا گیا ہے۔ ویڈیو میں دونوں رہنماؤں کی بہترین جھلکیاں شامل کر کے ان کے مختلف پسِ منظر کو نمایاں کیا گیا ہے، ایک طب کی دنیا سے اور دوسرا ریسلنگ انٹرٹینمنٹ سے۔ ایک اور طنزیہ پوسٹ میں روس میں ایرانی سفارت خانے کے اکاؤنٹ نے بنگلہ دیش میں پائے جانے والے ایک بھینسے کی تصویر شیئر کی ہے اور دعویٰ کیا ہے کہ اس کی شکل امریکی صدر ٹرمپ سے مشابہت رکھتی ہے۔