سکم قدرتی حسن، ماحولیاتی تحفظ کی حیرت انگیز مثال: ریکھا گپتا

نئی دہلی، 18 مئی (یو این آئی) دہلی کی وزیراعلیٰ ریکھا گپتا نے پیر کو کہا کہ سکم قدرتی حسن، ماحولیاتی تحفظ اور ثقافتی تنوع کی ایک حیرت انگیز مثال ہے۔
سکم ڈے کے تناظر میں آج دہلی سکریٹریٹ میں ایک شاندار ثقافتی پروگرام کا اہتمام کیا گیا۔ اس موقع پر محترمہ گپتا نے ریاست اور ہم وطنوں کو سکم ڈے کی مبارکباد دیتے ہوئے کہا کہ سکم قدرتی حسن، ماحولیاتی تحفظ اور ثقافتی تنوع کی حیرت انگیز مثال ہے۔ ہمالیہ کی گود میں واقع یہ ریاست نامیاتی کھیتی کو مکمل طور پر اپنانے والی ہندوستان کی پہلی مکمل آرگینک ریاست ہے، جس نے ماحولیاتی تحفظ کے شعبے میں پورے ملک کو ایک نئی سمت دی ہے۔ سکم نے ہمیشہ امن، ترقی اور قومی یکجہتی کا پیغام دیا ہے۔ انہوں نے کہا کہ تعلیم، سیاحت، ماحولیاتی تحفظ، نامیاتی زراعت اور قومی سلامتی جیسے شعبوں میں سکم کا تعاون انتہائی باعث تحریک ہے۔
آرٹ، کلچر اور زبان کے وزیر کپل مشرا نے کہا کہ وزیراعظم نریندر مودی کے ’ایک بھارت۔شریشٹھ بھارت‘ کے عزم کی سمت میں وزیراعلیٰ ریکھا گپتا کی قیادت میں دہلی حکومت تمام ریاستوں کے یوم تاسیس اور تہواروں کا اہتمام کر رہی ہے۔ ان پروگراموں سے ملک کی متنوع ثقافتی شناخت کو فروغ مل رہا ہے اور نئی نسل اس سے واقف ہو رہی ہے۔
اس دوران سکم کے لوک رقص سنگھی چھام، کھمپا، تامانگ سیلو اور ماسک ڈانس کی دلکش پیشکش نے سامعین کو مسحور کر دیا۔ رقص کے ذریعے فطرت اور دیوتاؤں کی عبادت کی گئی۔ گیت اور موسیقی کے اس پروگرام میں 10 فنکاروں نے شاندار کارکردگی کا مظاہرہ کیا۔