ویب ڈیسک
سری نگر؍۳۰؍ اپریل
حج کمیٹی آف انڈیا نے حج۲۰۲۶کے لیے رجسٹرڈ تمام عازمین کو ہدایت دی ہے کہ وہ فضائی کرایہ میں فرق کے طور پر اضافی۱۰۰؍امریکی ڈالر (تقریباً۱۰ہزار روپے)۱۵مئی۲۰۲۶تک جمع کرائیں۔
کمیٹی کی جانب سے جاری کردہ ایک سرکاری سرکلر کے مطابق یہ فیصلہ مشرقِ وسطیٰ میں جاری بحران اور ایوی ایشن ٹربائن فیول (اے ٹی ایف) کی قیمتوں میں غیر معمولی اضافے کے پیش نظر کیا گیا ہے۔ ایندھن کی بڑھتی ہوئی قیمتوں نے حج کے لیے چارٹرڈ پروازوں کے اخراجات کو نمایاں طور پر متاثر کیا ہے۔
حکام کے مطابق وزارتِ اقلیتی امور نے ایئرلائنز کی درخواست پر حج۲۰۲۶کے عازمین کے لیے ہوائی کرایے میں ایک مرتبہ نظرثانی کی منظوری دی، کیونکہ عالمی حالات کے باعث آپریشنل اخراجات میں اضافہ ہوا ہے۔
عازمین کو ہدایت دی گئی ہے کہ وہ یہ اضافی رقم حج کمیٹی کی سرکاری ویب سائٹ یا حج سویدھا ایپ کے ذریعے آن لائن (ڈیبٹ/کریڈٹ کارڈ یا نیٹ بینکنگ) سے جمع کریں۔ اس کے علاوہ اسٹیٹ بینک آف انڈیا اور یونین بینک آف انڈیا کی نامزد شاخوں میں بھی مخصوص پے اِن سلپس کے ذریعے ادائیگی کی جا سکتی ہے۔
تمام ریاستی اور یونین ٹیریٹری حج کمیٹیوں کو ہدایت دی گئی ہے کہ وہ عازمین کو فوری طور پر آگاہ کریں اور مقررہ وقت کے اندر ادائیگی کو یقینی بنائیں۔
یہ اقدام عالمی حالات کے باوجود حج۲۰۲۶کے سفری انتظامات کو بلا رکاوٹ جاری رکھنے کے لیے اٹھایا گیا ہے۔
