ہیٹ اسپیچ پر اضافی رہنما خطوط کی ضرورت نہیں: سپریم کورٹ نے کہا کہ موجودہ قوانین کافی

نئی دہلی، 29 اپریل (یو این آئی) سپریم کورٹ نے ملک بھر میں نفرت انگیز تقاریر (ہیٹ اسپیچ) پر قابو پانے کے لیے کوئی بھی نیا رہنما خطوط (گائیڈ لائنز) جاری کرنے سے بدھ کو انکار کر دیا جسٹس وکرم ناتھ اور جسٹس سندیپ مہتا کی بنچ نے اضافی حفاظتی اقدامات کا مطالبہ کرنے والی درخواستوں کو مسترد کرتے ہوئے کہا کہ ایسا نہیں ہے کہ ہیٹ اسپیچ کے مسئلے سے نمٹنے کے لیے کوئی قانون موجود نہیں ہے موجودہ قانونی ڈھانچے میں ایسے جرائم سے نمٹنے کے لیے کافی طریقہ کار موجود ہے۔ عدالت نے کہا کہ اصل تشویش قانون کی کمی نہیں بلکہ اس کے نفاذ کے تعلق سے ہے۔ بھارتیہ ناگرک سُرکشا سنہتا (بی این ایس ایس)، 2023 کے تحت قانونی اسکیم مجرمانہ قانون کو حرکت میں لانے کے لیے ایک جامع عمل فراہم کرتی ہے۔
بنچ نے کہا کہ اس کا علاج کئی سطحوں پر دستیاب ہے۔ اگر پولیس سپریم کورٹ کے 12 نومبر 2013 کے ‘للیتا کماری’ فیصلے کے مطابق ایف آئی آر درج کرنے میں ناکام رہتی ہے، تو متاثرہ شخص سینئر پولیس افسران سے رابطہ کر سکتا ہے اور اس کے بعد مجسٹریٹ سے رجوع کر سکتا ہے۔ عدالت نے کہا کہ سی آر پی سی کی دفعہ 156(3)، جو اب بی این ایس ایس کی دفعہ 175(3) ہو گئی ہے، اس کے تحت مجسٹریٹ کے نگرانی کے اختیارات کافی وسیع ہیں اور مناسب تفتیش کو یقینی بنانے کے لیے اسے استعمال کیا جا سکتا ہے۔
بنچ نے اس بات کو دہرایا کہ مسئلہ قانونی دفعات کی کمی سے نہیں بلکہ زمینی سطح پر ان کے نفاذ سے پیدا ہوتا ہے۔ جرائم کا تعین کرنا مقننہ کا کام ہے اور عدالتیں پارلیمنٹ یا ریاستی اسمبلیوں کو نئے قوانین بنانے کی ہدایت نہیں دے سکتیں۔ وہ زیادہ سے زیادہ اصلاحات کی ضرورت کی طرف توجہ مبذول کروا سکتی ہیں، لیکن قانون سازی کا فیصلہ منتخب اداروں کا ہی ہوتا ہے۔ اس کے ساتھ ہی، عدالت نے معاملے کی سنگینی کو تسلیم کرتے ہوئے تبصرہ کیا کہ "ہم یہ کہنا مناسب سمجھتے ہیں کہ ہیٹ اسپیچ اور افواہیں پھیلانے سے متعلق مسائل براہِ راست بھائی چارے، وقار اور آئینی نظام کے تحفظ کو متاثر کرتے ہیں۔”
یہ فیصلہ اس سلسلہ میں متعدد درخواستوں کے پیش نظر آیا ہے، جس میں 2022 میں عدالت کی طرف سے جاری کردہ گزشتہ ہدایات کی خلاف ورزی کا الزام لگانے والی توہینِ عدالت کی درخواستیں بھی شامل تھیں۔ اس وقت، عدالت نے ریاستوں اور مرکز کے زیر انتظام علاقوں کو ہدایت دی تھی کہ وہ باقاعدہ شکایات کا انتظار کیے بغیر، ازخود نوٹس (سو موٹو) لیتے ہوئے ہیٹ اسپیچ کے خلاف مقدمات درج کریں۔