ایجنسیز
جموں؍۲۹؍اپریل
وزیر اعلیٰ عمر عبداللہ کا ضلع کٹھوعہ کے بنی علاقے میں ترقیاتی منصوبوں کے افتتاح اور عوامی اجتماع سے خطاب کے لیے طے شدہ دورہ بدھ کے روز خراب موسمی حالات کے باعث منسوخ کر دیا گیا۔
بنی کے ایم ایل اے ڈاکٹر رمیشور سنگھ نے نامہ نگاروں کو بتایا’’خراب موسم اور بارش کی وجہ سے وزیر اعلیٰ کا پروگرام منسوخ کرنا پڑا، جس سے ہمیں کافی مایوسی ہوئی ہے۔ عوام بھی بہت دل برداشتہ ہیں‘‘۔
سنگھ نے کہا کہ وزیر اعلیٰ، وزیر تعلیم و صحت سکینہ ایتو کے ہمراہ بنی-لوہی ملار کا دورہ کرنے والے تھے، جہاں بڑی تعداد میں لوگ بلند توقعات کے ساتھ جمع ہوئے تھے۔
ممبر اسمبلی نے کہا’’ہم سب، اور علاقے کے تمام عوام، اس پروگرام سے بہت امیدیں وابستہ کیے ہوئے تھے۔ بہت سے لوگ وزیر اعلیٰ کے دورے کے لیے بے حد پرجوش تھے‘‘۔انہوں نے بتایا کہ شدید بارش کے باوجود بڑی تعداد میں لوگ مقامِ تقریب پر پہنچے۔
سنگھ نے کہا کہ وزیر اعلیٰ کو مقامی لوگوں سے بات چیت کرنی تھی، ایک عوامی اجتماع سے خطاب کرنا تھا، کئی منصوبوں کا سنگِ بنیاد رکھنا تھا اور کچھ کا افتتاح بھی کرنا تھا۔تاہم انہوں نے کہا کہ پروگرام کی منسوخی ناگزیر تھی۔’’یہ قدرت کا معاملہ ہے اور ہم اس کے بارے میں زیادہ کچھ نہیں کر سکتے‘‘۔
ایم ایل اے نے بتایا کہ اس دورے کو جلد ہی دوبارہ طے کیا جائے گا۔انہوں نے کہا’’آنے والے وقت میں وزیر اعلیٰ کا بنی-لوہی ملار کا ایک اور دورہ بہت جلد طے کیا جائے گا۔ ہم وزیر اعلیٰ سے بات کریں گے اور انہیں اور محترمہ سکینہ ایتو کو دوبارہ مدعو کریں گے‘‘۔
سنگھ نے کہا کہ وزیر اعلیٰ اس دورے میں شرکت کے خواہشمند تھے اور تقریباً دوپہر ڈیڑھ بجے تک موسم بہتر ہونے کا انتظار کرتے رہے۔ ’’تاہم اس وقت تک کوئی اجازت نہیں ملی اور آخرکار دورہ منسوخ کرنا پڑا۔‘‘
