سرینگر؍۲۹؍اپریل
سرینگر میں دہشت گرد نیٹ ورکس کے خلاف ایک بڑی کارروائی کے دوران جموں و کشمیر پولیس نے متعدد آپریشنز انجام دیتے ہوئے ایک ڈاکٹر سمیت پانچ اوور گراؤنڈ ورکرز (او جی ڈبلیوز) کو گرفتار کر لیا اور اسلحہ، گولہ بارود سمیت دیگر قابلِ اعتراض مواد برآمد کیا، حکام نے بدھ کو بتایا۔
ایک سینئر پولیس افسر نے ایک مقامی خبر رساں ایجنسی کو بتایا کہ ایک اہم پیش رفت میں زڈی بل، صورہ، لالبازار اور زکورہ کے سینئر پولیس افسران کی قیادت میں مشترکہ ٹیم نے منگل کی شام مل پھاک کے چنا محلہ علاقے میں ایک دہشت گرد ٹھکانے کا پردہ فاش کیا۔
پولیس نے اس ٹھکانے سے ایک اے کے۴۷رائفل‘۱۴راؤنڈ گولہ بارود اور ایک ہینڈ گرینیڈ برآمد کیا۔
ایک اور کارروائی میں پیر اور منگل کی درمیانی شب پولیس پوسٹ کھنموہ کی ٹیم نے نارد سنگری، کھنموہ میں ناکہ چیکنگ کے دوران پانچ افراد کو گرفتار کیا۔
کارروائی کے دوران پولیس نے ان کے قبضے سے دو ہینڈ گرینیڈ، دو میگزین، زندہ کارتوس، پوسٹرز اور چھ موبائل فون برآمد کیے۔ اس سلسلے میں پولیس اسٹیشن پانتھہ چوک میں مقدمہ درج کر کے مزید تحقیقات شروع کر دی گئی ہیں۔
پولیس کے مطابق وسیع تر دہشت گرد نیٹ ورک کو بے نقاب کرنے اور اس میں ملوث دیگر افراد کی شناخت کے لیے تحقیقات جاری ہیں۔
یہ تمام کارروائیاں سینئر سپرنٹنڈنٹ آف پولیس سری نگر جی وی چکرورتی کی نگرانی میں انجام دی گئیں، جن کے نتیجے میں سری نگر میں دہشت گرد نیٹ ورکس کو بڑا نقصان پہنچا ہے۔
