مانو ٹھکر، مانوش شاہ، دیا چتلے دوبارہ پول میں شامل، ستین اور منیکا کو ٹیموں نے برقرار رکھا

نئی دہلی، 25 اپریل (یو این آئی) ہندوستانی اسٹار کھلاڑی مانو ٹھکر، مانوش شاہ اور دیا چتلے بٹر فلائی الٹی میٹ ٹیبل ٹینس (یو ٹی ٹی) سیزن 7 کے کھلاڑیوں کے پول میں نمایاں ہیں۔ ٹیموں نے نیلامی سے پہلے تجربہ کار کھلاڑیوں ستیان گیان شیکھرن اور منیکا بترا کو برقرار رکھا ہے۔ ایکشن سے بھرپور سیزن 7، 9 سے 26 جولائی تک گوا کے ڈاکٹر شیاما پرساد مکھرجی انڈور اسٹیڈیم میں کھیلا جائے گا۔
آنے والے سیزن کے کھلاڑیوں کے پول میں معروف ہندوستانی ناموں، ابھرتی ہوئی صلاحیتوں اور اعلیٰ بین الاقوامی پیڈلرز کا مضبوط امتزاج شامل ہے۔ فرنچائزز 28 اپریل کو ممبئی کے سہارا اسٹار میں ہونے والی نیلامی میں اپنی ٹیمیں تشکیل دیں گی۔
ٹھکر اور شاہ بین الاقوامی مصروفیات کی وجہ سے ایک سال کے وقفے کے بعد نیلامی پول میں واپس آئے ہیں۔ یہ جوڑی اس وقت مردوں کے ڈبلز میں دنیا میں پانچویں نمبر پر ہے اور بین الاقوامی سرکٹ میں باقاعدگی سے کھیلتی ہے۔ شاہ، چتلے کے ساتھ مکسڈ ڈبلز میں بھی جوڑی بناتے ہیں۔ یہ جوڑی دنیا میں چھٹے نمبر پر ہے اور ڈبلیو ٹی ٹی فائنلز کے لیے کوالیفائی کرنے والی پہلی ہندوستانی جوڑی بن کر تاریخ رقم کر چکی ہے۔
چتلے جو گزشتہ سیزن کی نیلامی میں سب سے مہنگی کھلاڑی تھیں، دوبارہ پول میں شامل ہو گئی ہیں۔ دبنگ دہلی ٹی ٹی سی نے ستیان کو برقرار رکھنے کا فیصلہ کیا جس سے فرنچائز کے ساتھ ان کا تعلق مسلسل ساتویں سیزن تک برقرار رہے گا۔ دوسری جانب، منیکا بترا گزشتہ سیزن میں چوٹ کی وجہ سے نہیں کھیل سکی تھیں لیکن اب وہ لیگ میں واپسی کر رہی ہیں۔ انہیں احمد آباد اے پی ایل پائپرز نے برقرار رکھا ہے۔
نیلامی سے قبل ٹیموں نے اپنے ریٹینشن آپشنز کا بھی استعمال کیا ہے۔ بترا اور گیان شیکھرن کے علاوہ انکر بھٹاچاریہ اور ڈبلز ماہر آکاش پال کو بالترتیب کولکاتہ تھنڈر بلیڈز اور یو ممبئی ٹی ٹی نے برقرار رکھا ہے۔ ڈیمپو گوا چیلنجرز اور پی بی جی پونے جگوارز نے اپنے ریٹینشن آپشن کا استعمال نہ کرنے کا فیصلہ کیا ہے۔ وہ نئی شامل ہونے والی ٹیم یو پی پرومیتھیئنز کے ساتھ نیلامی میں مکمل بجٹ کے ساتھ اتریں گی۔
ٹیبل ٹینس فیڈریشن آف انڈیا (ٹی ٹی ایف آئی) کی نگرانی میں نیرج بجاج اور ویتا دانی کی جانب سے پروموٹ کی جا رہی اس فرنچائز پر مبنی لیگ میں ٹیمیں ایک بار پھر نیلامی کے نظام کے ذریعے اپنی ٹیمیں تیار کریں گی، ہر فرنچائز کو ایک کروڑ ٹوکن کا بجٹ دیا جائے گا۔