ایجنسیز
بڈگام؍۲۵؍اپریل
وسطی کشمیر کے ضلع بڈگام میں حکام نے کھاگ کے بعض علاقوں میں واقع چشموں کے پانی کو پینے کے لیے غیر محفوظ قرار دیتے ہوئے عوامی ایڈوائزری جاری کی ہے، جس میں لوگوں سے احتیاط برتنے اور بغیر حفاظتی اقدامات کے اس پانی کے استعمال سے گریز کرنے کی اپیل کی گئی ہے۔
اسسٹنٹ ایگزیکٹو انجینئر‘ پی ایچ ای سب ڈویژن بیروہ کے دفتر کی جانب سے جاری نوٹس کے مطابق زَرگر محلہ، اپری باغ اور سوگین علاقوں کے قدرتی چشموں کے پانی کو بلاک میڈیکل آفیسر (بی ایم او) کھاگ کی جانب سے کیے گئے ٹیسٹ کی بنیاد پر پینے کے لیے غیر محفوظ پایا گیا ہے۔
ایڈوائزری میں کہا گیا ہے کہ متاثرہ علاقوں کے عوام اگلے احکامات تک ان ذرائع کے پانی کو صرف دھلائی اور دیگر غیر پینے کے مقاصد کے لیے استعمال کریں۔
حکام نے یہ بھی ہدایت دی ہے کہ اگر ناگزیر حالات میں اس پانی کا استعمال کرنا پڑے تو احتیاطی تدبیر کے طور پر اسے اچھی طرح اُبالنے کے بعد ہی پیا جائے۔
پی ایچ ای محکمہ کے مطابق متاثرہ آبی ذرائع کے نمونے ازسرِ نو حاصل کر کے ان کی جانچ کی جائے گی، اور پانی کے معیار کو بحال کرنے کے لیے ضروری تکنیکی اقدامات کو ترجیحی بنیادوں پر مکمل کیا جائے گا تاکہ جلد از جلد اسے پینے کے قابل بنایا جا سکے۔
ایڈوائزری میں عوام سے تعاون کی اپیل بھی کی گئی ہے تاکہ صحت عامہ کے تحفظ کو یقینی بنایا جا سکے، جبکہ مقامی انتظامیہ اور پولیس کو ہدایت دی گئی ہے کہ اس اطلاع کو وسیع پیمانے پر عام کیا جائے۔
