دہلی ہوائی اڈے پر ٹیکسی کر رہا طیارہ دوسرے طیارے سے ٹکرا گیا

نئی دہلی، 16 اپریل (یو این آئی) دہلی کے اندرا گاندھی بین الاقوامی ہوائی اڈے پر جمعرات کو اسپائس جیٹ کے ٹیکسی کر رہے ایک طیارے کا پر اکاسا کے کھڑے طیارے کے پچھلے پر سے ٹکرا گیا۔ یہ حادثہ ہوائی اڈے کے ٹرمینل-1 پر پیش آیا۔
ذرائع نے بتایا کہ اسپائس جیٹ کا بی ۔737-700 طیارہ (پرواز نمبرایس جی ۔ 124) لیہہ سے دہلی آیا تھا۔ طیارہ لینڈنگ کے بعد پارکنگ بے میں ٹیکسی کر رہا تھا۔ دوسری طرف اکاسا کابی ۔ 737 طیارہ پش بیک کے بعد ایپرن پر کھڑا تھا۔ اسے دہلی سے بنگلورو کے لیے اڑان بھرنی تھی۔
اکاسا طیارے کے بائیں جانب کے پچھلے پر میں اسپائس جیٹ طیارے کے دائیں پر کا اوپر اٹھا ہوا حصہ (ونگلیٹ) گھس گیا۔ دونوں متاثرہ طیارے سروس سے باہر کر دیے گئے ہیں۔ ڈائریکٹوریٹ جنرل آف سول ایوی ایشن معاملے کی جانچ کر رہا ہے۔