ایجنسیز
سرینگر؍۱۴؍اپریل
انسپکٹر جنرل آف پولیس کشمیر وی کے بردی نے منگل کو کہا کہ وادی میں انسدادِ منشیات مہم آنے والے دنوں میں مزید تیز کی جائے گی، جس میں منشیات کے نیٹ ورکس کو ختم کرنے پر خاص توجہ دی جائے گی۔
بیساکھی تقریبات کے دوران ایک گوردوارہ میں میڈیا سے بات کرتے ہوئے آئی جی پی نے سکھ برادری کو مبارکباد پیش کی اور امن و سماجی ہم آہنگی برقرار رکھنے کے لیے پولیس کے عزم کا اعادہ کیا۔
بردی نے کہا کہ جموں و کشمیر پولیس منشیات کے خلاف مشن موڈ میں کام کر رہی ہے اور اب کارروائیوں کو مزید تیز کیا جائے گا تاکہ منشیات فروشوں، اسمگلروں اور غیر قانونی تجارت میں ملوث تمام عناصر کو نشانہ بنایا جا سکے۔
آئی جی پی نے کہا کہ بڑھتے ہوئے منشیات کے خطرے کو روکنے اور ایک محفوظ معاشرہ یقینی بنانے کے لیے مجرموں کے خلاف سخت قانونی کارروائی کی جائے گی۔
نوجوانوں کے کردار پر زور دیتے ہوئے انہوں نے کہا کہ نوجوان نظم و ضبط اختیار کریں اور منشیات سے دور رہیں کیونکہ ایک صحت مند اور ترقی پسند معاشرے کی تعمیر میں ان کا کردار نہایت اہم ہے۔
بردی نے مزید کہا’’نوجوانوں کو چاہیے کہ وہ منشیات سے دور رہیں اور معاشرے اور ملک کے لیے مثبت کردار ادا کریں۔‘‘
