خانہ کعبہ کے تقدس اور خوبصورتی کے لیے کام کا آغاز

مکہ مکرمہ، 13 اپریل (یو این آئی) سعودی عرب میں وزیر حج و عمرہ ڈاکٹر توفیق الربیعہ نے اعلان کیا ہے کہ خانہ کعبہ کی معمول کے مطابق دیکھ بھال کے کام کا آغاز کیا گیا ہے۔
سعودی خبر رساں ادارے کی رپورٹ کے مطابق یہ اقدام بیت اللہ کے تعمیراتی عناصر کو محفوظ رکھنے اور اس کی مسلسل دیکھ بھال کے عمل کا حصہ ہے۔ رپورٹس کے مطابق وزیر حج و عمرہ نے آفیشل ایکس اکاونٹ پر پوسٹ میں لکھا ’خانہ کعبہ کی دیکھ بھال کے امور میں خادم حرمین شریفین شاہ سلمان بن عبدالعزیز اور ولی عہد و وزیر اعظم شہزادہ محمد بن سلمان کی مسلسل سرپرستی اور توجہ حاصل ہے۔‘
واضح رہے مسجد الحرام اور مسجد نبوی صلی اللہ علیہ وآلہ وسلم کے امور کی جنرل اتھارٹی خانہ کعبہ کی مسلسل دیکھ بھال، اس کے تعمیرانی عناصر کو محفوظ رکھنے کا کام اعلی معیارات کے مطابق جدید ٹیکنالوجی کے ذریعے انجام دیتی ہے۔
سعودی حکومت کی ہمیشہ یہ کوشش رہتی ہے کہ خانہ کعبہ اور اس سے متعلقہ تمام اشیا ہمیشہ خوبصورت اور شاندار شکل نظر آئیں۔ یاد رہے کہ رواں برس میں حج سیزن کا آغاز آئندہ ہفتے سے ہو رہا ہے، 18 اپریل سے باقاعدہ حج پراوازوں کی آمد کا سلسلہ شروع ہو جائے گا۔