پلوامہ‘بارہمولہ اور سوپور میں پولیس کارروائی‘چارد منشیات فروش گرفتار
ایجنسیز
سرینگر؍۷؍ اپریل
منشیات کے خلاف جاری کارروائیوں کے تحت جموں و کشمیر پولیس نے شوپیان میں ایک بڑی کارروائی انجام دیتے ہوئے منشیات کی غیر قانونی تجارت سے حاصل آمدنی سے خریدی گئی جائیداد کو ضبط کر لیا ہے۔
پولیس بیان کے مطابق ترنژ امام صاحب، شوپیان کے رہائشی محمد ایوب ملک کی ایک کروڑ۴۳ لاکھ۹۰ ہزار روپے مالیت کی غیر منقولہ جائیداد کو ضبط کیا گیا ہے۔ یہ جائیداد۱۰ کنال اراضی پر مشتمل ہے جو کھوات نمبر۱۲۹۸؍اور۶۱۲ کے تحت درج ہے۔
پولیس نے بتایا کہ یہ جائیداد منشیات کی غیر قانونی تجارت سے حاصل رقم سے خریدی گئی تھی، جس کے باعث اسے پولیس اسٹیشن امام صاحب کے ایف آئی آرکے تحت ضبط کیا گیا۔
یہ کارروائی ایک مجاز پولیس ٹیم، ایگزیکٹو مجسٹریٹ، لمبردار اور چوکیدار کی موجودگی میں انجام دی گئی تاکہ تمام قانونی تقاضوں اور شفافیت کو یقینی بنایا جا سکے۔
پولیس نے منشیات کے خلاف اپنی مہم جاری رکھنے کے عزم کا اعادہ کرتے ہوئے کہا کہ نہ صرف منشیات فروشوں بلکہ ان کے غیر قانونی اثاثوں کو بھی نشانہ بنایا جائے گا۔ عوام سے بھی اپیل کی گئی ہے کہ وہ منشیات سے متعلق کسی بھی سرگرمی کی اطلاع پولیس کو دیں۔
ادھر، پولیس نے اپنی کارروائیوں کو جاری رکھتے ہوئے پلوامہ، بارہمولہ اور سوپور میں چار منشیات فروشوں کو گرفتار کیا اور ان کے قبضے سے ممنوعہ اشیاء برآمد کیں۔
پلوامہ کے چیوی کلان علاقے میں ناکہ چیکنگ کے دوران پولیس پوسٹ نیوا کی ٹیم نے غلام حسن وانی کو گرفتار کیا، جس کے قبضے سے نائلون بیگ میں چھپائی گئی۲ء۳۰۰ کلو گرام پوست کی بھوسی برآمد ہوئی۔
بارہمولہ کے اولڈ ٹاؤن کے جل صاحب علاقے میں ایریا ڈومینیشن پٹرولنگ کے دوران دو افراد، فاروق احمد بھٹ اور نثار احمد وار کو اس وقت گرفتار کیا گیا جب وہ پولیس کو دیکھ کر فرار ہونے کی کوشش کر رہے تھے۔ ان کے قبضے سے۱۷گرام براؤن شوگر برآمد ہوئی۔اسی طرح سوپور کے چیجھامہ کراسنگ پر ناکہ چیکنگ کے دوران مشتاق احمد پرے کو گرفتار کیا گیا، جس کے قبضے سے چرس جیسا مادہ برآمد ہوا۔
ان تمام معاملات میں متعلقہ پولیس اسٹیشنوں میں مقدمات درج کر کے تحقیقات شروع کر دی گئی ہیں۔
جموں و کشمیر پولیس نے منشیات کے خلاف ’زیرو ٹالرنس‘ پالیسی کو دہراتے ہوئے کہا کہ نوجوانوں اور معاشرے کو اس ناسور سے بچانے کے لیے کارروائیاں جاری رہیں گی۔
