ٹرمپ نے ایران کیلئے حتمی وقت مقرر کر دیا، ڈیڈ لائن منگل رات 8 بجے

واشنگٹن، 5 اپریل (یواین آئی): امریکی صدر ڈونلڈ ٹرمپ نے ایران کے ساتھ معاہدے کے لیے دی گئی ڈیڈ لائن کا واضح وقت جاری کرتے ہوئے خبردار کیا ہے کہ مقررہ وقت تک پیش رفت نہ ہونے کی صورت میں سخت اقدامات کیے جا سکتے ہیں۔
سوشل میڈیا پر جاری اپنے پیغام میں صدر ٹرمپ نے کہا کہ ایران کے لیے ڈیڈ لائن منگل رات 8 بجے (ایسٹرن ٹائم) مقرر کی گئی ہے۔
میڈیا رپورٹس کے مطابق یہ وقت ایران میں رات 3:30 بجے جبکہ پاکستان میں بدھ کی صبح 5 بجے کے مساوی ہوگا۔
اس سے قبل ایک امریکی اخبار سے گفتگو میں ٹرمپ نے کہا تھا کہ ایران کو جنگ کے خاتمے کے لیے کوئی واضح ٹائم لائن نہیں دی جا سکتی، تاہم اگر ایران نے منگل کی شام تک آبنائے ہرمز نہ کھولی تو اس کے پاور پلانٹس کو نشانہ بنایا جائے گا۔
رپورٹ کے مطابق ٹرمپ نے خبردار کیا کہ اگر ایران مقررہ وقت تک کوئی قدم نہ اٹھائے تو "نہ کوئی بجلی گھر باقی رہے گا اور نہ کوئی پل کھڑا رہے گا”۔
امریکی نیوز نیٹ ورک اے بی سی نیوز سے گفتگو میں انہوں نے کہا کہ مشرق وسطیٰ کا تنازع ہفتوں نہیں بلکہ دنوں میں ختم ہونا چاہیے۔
ٹرمپ کے مطابق اگر معاہدہ نہ ہوا تو ایران کے بڑے حصے کو تباہ کیا جا سکتا ہے، جبکہ انہوں نے یہ بھی کہا کہ امریکی زمینی فوج کی تعیناتی ضروری نہیں، لیکن اسے مکمل طور پر رد بھی نہیں کیا جا سکتا۔
انہوں نے مزید کہا کہ معاہدہ جلد ہو بھی سکتا ہے اور نہیں بھی، اور اس حوالے سے صورتحال غیر یقینی ہے۔