خلیجی ممالک کا آبنائے ہرمز کے متبادل کے طور پر نئی پائپ لائنز کی تعمیر پر غور

لندن،2 اپریل ن(یواین آئی ) خلیجی ممالک نے آبنائے ہرمز کے متبادل کے طور پر نئی پائپ لائنز کی تعمیر پر غور شروع کردیا تاہم پائپ لائنز کی تعمیر تکنیکی طور پر انتہائی دشوار اور مالی طور پر بہت مہنگی ہے۔
تفصیلات کے مطابق عالمی جریدے ‘فائننشل ٹائمز’ نے اپنی تازہ ترین رپورٹ میں انکشاف کیا ہے کہ مشرقِ وسطیٰ کی تیزی سے بدلتی صورتحال کے پیشِ نظر خلیجی ممالک نے تیل کی ترسیل کے لیے آبنائے ہرمز کے متبادل راستوں کی تلاش شروع کر دی ہے۔
رپورٹ میں کہا گیا کہ خلیجی ریاستیں اب سمندری راستے کے بجائے نئی پائپ لائنز کی تعمیر کو ترجیح دینے پر غور کر رہی ہیں۔ رپورٹ میں بتایا گیا ہے کہ پائپ لائنز کی تعمیر تکنیکی طور پر انتہائی دشوار اور مالی طور پر بہت مہنگی ہے، لیکن موجودہ حالات میں سمندری راستوں پر بڑھتے ہوئے خطرات کے باعث اسے ایک ناگزیر متبادل کے طور پر دیکھا جا رہا ہے۔ اعداد و شمار کے حوالے سے رپورٹ کے مطابق آبنائے ہرمز سے ہونے والی تیل کی یومیہ ترسیل، جو کسی زمانے میں 20 ملین بیرل تھی، اب 95 فیصد سے بھی کم رہ گئی ہے۔ سعودی عرب کی ایسٹ ویسٹ پائپ لائن کی موجودہ گنجائش محض 7 ملین بیرل یومیہ ہے، جو کہ آبنائے ہرمز کے ذریعے ہونے والی عالمی ترسیل کا نعم البدل نہیں بن سکتی۔
فائننشل ٹائمز نے خبردار کیا ہے کہ اگرچہ خلیجی ممالک متبادل راستوں پر کام کر رہے ہیں، لیکن یہ تمام تر کوششیں آبنائے ہرمز کی بندش یا وہاں سے ہونے والی ترسیل میں کمی کے خلا کو پُر کرنے کے لیے نا کافی ثابت ہو سکتی ہیں۔
ماہرین کا کہنا ہے کہ پائپ لائنز کی محدود گنجائش کی وجہ سے عالمی منڈی میں تیل کی سپلائی کا توازن بگڑنے کا خدشہ موجود ہے۔
ادھر فلپائن کی وزارت خارجہ نے بتایا کہ ملک کو ایران کی طرف سے ایک یقین دہانی ملی ہے کہ وہ فلپائن کے جھنڈے والے ایندھن بردار جہازوں کو آبنائے ہرمز سے محفوظ گزرنے کی اجازت دے گا۔
میڈیا رپورٹس کے مطابق یہ یقین دہانی فلپائنی وزیر خارجہ ما تھریسا لازارو ایرانی ہم منصب عباس عراقچی کے مابین توانائی کی محفوظ فراہمی کے سے متعلق بات چیت کے درمیان سامنے آئی۔
فلپائنی وزارت خارجہ نے ایک بیان میں کہا کہ کال کے دوران ایرانی وزیر خارجہ نے ہمیں یقین دلایا کہ ایران فلپائن کے جھنڈے تلے تمام فلپائنی بحری جہازوں کے آبنائے ہرمز سے محفوظ، بلا روک ٹوک اور تیز رفتار گزرنے کی اجازت دے گا۔ لازارو نے ٹیلیفونک رابطے کو "پیداواری” قرار دیتے ہوئے کہا کہ ہم سمندری مسافروں کی حفاظت اور فلپائن کی توانائی کی ضروریات کی حفاظت کو یقینی بنانے کے لیے ایک مثبت تفہیم تک پہنچے ہیں۔
فلپائنی وزارت خارجہ نے کہا کہ یہ یقین دہانیاں ملک کی توانائی کی سلامتی کو تقویت بخشیں گی۔ وزارت نے کہا کہ اس بات کو دیکھتے ہوئے کہ فلپائن اپنی توانائی کی ضروریات کا زیادہ تر حصہ مشرق وسطیٰ سے درآمد کرتا ہے، ایران کی طرف سے یہ یقین دہانیاں فلپائن کو تیل اور کھاد کی اہم سپلائی کی مسلسل ترسیل میں بہت سہولت فراہم کریں گی۔