سونیا گاندھی کو ایک ہفتے بعد ہسپتال سے چھٹی مل گئی

نئی دہلی، 31 مارچ (یو این آئی) سینئر کانگریس لیڈر سونیا گاندھی کو ایک ہفتے کے علاج کے بعد منگل کو قومی راجدھانی کے سر گنگا رام ہسپتال سے چھٹی مل گئی۔ ڈاکٹروں کے مطابق ان کی صحت میں اب کافی بہتری ہے اور وہ مکمل طور پر صحت مند ہیں۔
ہسپتال کے چیئرمین ڈاکٹر اجے سوروپ نے بیان جاری کرتے ہوئے بتایا کہ محترمہ گاندھی کو ‘سسٹمک انفیکشن’ کی وجہ سے ہسپتال میں داخل کرایا گیا تھا، جس کے علاج کے لیے انہیں اینٹی بائیوٹکس دی گئیں۔ علاج کا ان پر مثبت اثر ہوا اور ان کی صحت میں بہتری آئی ہے۔ انہوں نے بتایا کہ محترمہ گاندھی کا علاج ڈاکٹروں کی ایک ماہر ٹیم کی نگرانی میں کیا گیا، جس میں ڈاکٹر ڈی ایس رانا، ڈاکٹر ایس نندی اور ڈاکٹر اروپ بسو شامل تھے۔ ڈاکٹروں کے مطابق اب ان کی حالت مکمل طور پر مستحکم ہے، تاہم انہیں ابھی گھر پر آرام کرنے کا مشورہ دیا گیا ہے۔
قابل ذکر ہے کہ محترمہ گاندھی کو 24 مارچ کو بخار ہونے کے بعد سر گنگا رام ہسپتال میں داخل کیا گیا تھا، اب وہ مکمل طور پر صحت یاب ہیں۔