آئی پی ایل 2026: رائے پور میں بڑے مقابلے، شائقین کے لیے بہتر سہولیات

رائے پور، 27 مارچ (یو این آئی) انڈین پریمیئر لیگ 2026 کے دوسرے مرحلے کے شیڈول کے اعلان کے ساتھ ہی چھتیس گڑھ کا دارالحکومت رائے پور ایک بار پھر کرکٹ کے بڑے ایونٹ کی میزبانی کے لیے تیار ہے۔ رائل چیلنجرز بنگلورو (آر سی بی) اپنے دو ہوم گراؤنڈ مقابلے یہاں واقع شہید ویر نارائن سنگھ انٹرنیشنل کرکٹ اسٹیڈیم میں کھیلے گی۔
جاری کردہ پروگرام کے مطابق، آر سی بی کا پہلا مقابلہ 10 مئی کو ممبئی انڈینز کے خلاف اور دوسرا 13 مئی کو کولکتہ نائٹ رائیڈرز (کے کے آر) سے ہوگا۔ ٹورنامنٹ کے بقیہ لیگ میچز 13 اپریل سے 24 مئی کے درمیان منعقد کیے جائیں گے۔
ان مقابلوں میں وراٹ کوہلی، روہت شرما اور ہاردک پانڈیا جیسے بڑے کھلاڑیوں کے میدان میں اترنے کے امکان نے شائقین میں زبردست جوش و خروش پیدا کر دیا ہے۔ وہیں، کے کے آر کے میچ کے حوالے سے ٹیم کے شریک مالک شاہ رخ خان کی رائے پور آمد کی بھی چہ مگوئیاں ہو رہی ہیں۔
میچوں کے پیشِ نظر اسٹیڈیم میں شائقین کے لیے سہولیات کو جدید کیا جا رہا ہے۔ خاص طور پر گولڈ اور پریمیم کیٹیگری کی نشستوں میں بہتری کے ساتھ ساتھ وی آئی پی شائقین کے لیے اضافی انتظامات کیے جا رہے ہیں۔ محدود جگہ کے باوجود کچھ نئی وی آئی پی نشستیں شامل کرنے کی تیاری ہے تاکہ زیادہ سے زیادہ شائقین کو بہتر تجربہ مل سکے۔
سیکیورٹی کے حوالے سے بھی اس بار خصوصی چوکسی برتی جا رہی ہے۔ منتظمین کے مطابق، ہجوم کے انتظام اور ہنگامی صورتحال سے نمٹنے کے لیے جامع منصوبہ بندی کی گئی ہے۔ مقبول کھلاڑیوں، بالخصوص وراٹ کوہلی کی موجودگی کو مدنظر رکھتے ہوئے سکیورٹی کے سخت انتظامات کیے جائیں گے۔
قابلِ ذکر ہے کہ سال 2016 کے بعد پہلی بار رائے پور میں آئی پی ایل میچوں کا انعقاد ہو رہا ہے۔ اب ایک بار پھر بین الاقوامی معیار کی سہولیات سے آراستہ یہ اسٹیڈیم بڑے کرکٹ میلے کا گواہ بنے گا۔