نئی دہلی، 25 مارچ (یو این آئی) لوک سبھا نے مالی سال 27-2026 میں حکومت کی بجٹ تجاویز کو نافذ کرنے کے لیے اہم ‘مالیاتی بل 2026’ بدھ کو صوتی ووٹ سے منظور کر لیا وزیر خزانہ نرملا سیتا رمن نے لوک سبھا میں مالیاتی بل پر دو روزہ بحث کا جواب دیتے ہوئے کہا کہ حکومت معیشت کو مضبوطی سے آگے بڑھانے کے لیے ٹیکسوں میں اصلاحات کر کے کاروبار کو آسان بنانے کے لیے کوشاں ہے۔ انہوں نے بتایا کہ بیرون ملک جانے والے سیاحوں کے لیے ٹیکس میں رعایت دی گئی ہے اور جو لوگ بیرون ملک سے ضروری سامان لاتے ہیں، ان کی سہولت کے لیے ایئرپورٹ پر طریقہ کار کو رکاوٹوں سے پاک اور سادہ بنایا گیا ہے۔ ان کا کہنا تھا کہ انکم ٹیکس کے نظام کو سہل بنانے پر خصوصی توجہ دی گئی ہے تاکہ لوگوں کو کاروبار بڑھانے میں مدد ملے اور ٹیکس دہندگان کو آسانی ہو۔
وزیر خزانہ نے کہا کہ مالیاتی خسارے کو کم کرنا حکومت کی ترجیح رہی ہے اور اسے بتدریج کم کیا جا رہا ہے۔ انہوں نے بتایا کہ 21-2020 میں مالیاتی خسارہ 9.3 فیصد تھا، جس میں اب تک 4.3 فیصد کی کمی ہوئی ہے۔ اسی طرح عالمی سطح پر قرضوں کے معاملے میں بھی ہندوستان؛ چین، جاپان اور امریکہ جیسے ممالک کے مقابلے کہیں بہتر پوزیشن میں ہے۔ انہوں نے دعویٰ کیا کہ ملک کی معاشی بنیاد اتنی مضبوط ہے کہ اب کوئی بھی بڑا بحران اسے کمزور نہیں کر سکتا۔ انہوں نے مزید کہا کہ 2008 میں متحدہ ترقی پسند اتحاد (یو پی اے) کی حکومت کے دور میں آنے والے معمولی معاشی بحران نے حکومت کو ہلا کر رکھ دیا تھا۔
انہوں نے کہا کہ ان کی حکومت جو اصلاحات کر رہی ہے، وہ کسی مجبوری میں نہیں بلکہ واضح نیت اور پختہ یقین کے ساتھ کی جا رہی ہیں۔ حکومت ملک کی تعمیر اور ترقی کے ایک مسلسل عمل کے تحت کام کر رہی ہے، جو ایک رات میں مکمل ہونے والا کام نہیں ہے۔ ملک کے 140 کروڑ عوام کی امنگوں کو پورا کرنے کے مقصد سے وزیر اعظم نریندر مودی کی قیادت میں یہ اصلاحات پختہ عزم کے ساتھ کی جا رہی ہیں اور ملک میں ترقی کا عمل اب ‘ایکسپریس وے’ پر گامزن ہے۔ حکومت کی توجہ، اعتماد پر مبنی ٹیکس نظام بنانا ہے، جس کے تحت ایماندار ٹیکس دہندگان کی مشکلات کم کی جا رہی ہیں۔ ٹیکس انتظامیہ کو زیادہ شفاف اور آسان بنانے کے لیے کئی اقدامات کیے گئے ہیں۔
وزیر خزانہ نے کہا کہ بل میں ٹیکس انتظامیہ کو بہتر بنا کر عام لوگوں کی پریشانیاں کم کی گئی ہیں۔ کسانوں کو مضبوط کیا جا رہا ہے کیونکہ وہ ملک کی ریڑھ کی ہڈی ہیں۔ ہندوستان کو ایک عالمی مرکز بنانے کے لیے ٹیکس سے متعلق کئی اصلاحات لائی گئی ہیں، جن میں الیکٹرانکس اور مینوفیکچرنگ سمیت کئی شعبوں میں تیزی سے کام ہو رہا ہے۔ کاروبار میں آسانی لانے اور کسٹم ڈیوٹی کو درست کرنے کی سمت تمام ضروری اقدامات اٹھائے جا رہے ہیں۔
وزیر خزانہ نے کانگریس کے امر سنگھ کے الزامات کو مسترد کرتے ہوئے کہا کہ متوسط طبقے کے لیے بہت کچھ کیا گیا ہے۔ عام لوگوں کو راحت دینے کے لیے 17 ضروری زندگی بچانے والی دواؤں کو بنیادی کسٹم ڈیوٹی سے مستثنیٰ کر دیا گیا ہے، جس سے ان کی قیمتیں کم ہوں گی اور مریضوں کو براہِ راست فائدہ پہنچے گا۔ انہوں نے کہا کہ بیرون ملک سے سامان لانے میں اب لوگوں کو کسی قسم کی دقت نہیں ہوگی، جس کا فائدہ متوسط طبقے کو ملے گا۔ انہوں نے مزید کہا کہ بیرون ملک جانے والے سیاحوں کے لیے ٹیکس ہٹایا گیا ہے اور جو بچے بیرون ملک تعلیم حاصل کر رہے ہیں، ان کے لیے فیس، ادویات اور اشیائے خوردونوش پر لگنے والے چارجز میں کمی کی گئی ہے۔ بیرون ملک جانے والے مسافروں کے اخراجات کو منطقی بنایا گیا ہے تاکہ انہیں سامان لانے میں دشواری نہ ہو۔
انہوں نے کہا، "اپوزیشن بار بار اضافی ٹیکس (سیس ) لگانے پر سوال اٹھاتی ہے۔ انہیں بتانا چاہتے ہیں کہ سیس لگانے کا حق مرکزی حکومت کے پاس ہے۔ جس طرح ریاستوں کے پاس ٹیکس لگانے کا حق ہے اور ہم اس پر سوال نہیں اٹھاتے، اسی طرح آئین نے ہمیں بھی یہ حق دیا ہے۔ سیس کے طور پر جو رقم جمع ہوتی ہے، اس سے کہیں زیادہ رقم ریاستوں پر خرچ کی جاتی ہے۔ اس سے مجموعی تعلیم، مڈ ڈے میل اسکیم اور ریاستی تحفظ کی اسکیموں میں ریاستوں کو بڑا فائدہ ہوا ہے۔”
محترمہ سیتا رمن نے کہا کہ ڈیٹا سینٹرز کی تعمیر سے ہندوستانیوں کو ہی نوکریاں ملیں گی، جس سے ہندوستان کی ‘کلاؤڈ’ صلاحیت بڑھے گی اور بڑے پیمانے پر روزگار پیدا ہوگا۔ انہوں نے یہ بھی بتایا کہ گڈز اینڈ سروسز ٹیکس (جی ایس ٹی) میں ستمبر 2025 میں جو کٹوتی کی گئی تھی، اس کے بعد سے فروخت میں 26.1 فیصد اضافہ ہوا ہے۔ مسافر گاڑیوں کی فروخت میں تقریباً 34 فیصد اضافہ ریکارڈ کیا گیا ہے۔ جی ایس ٹی میں کٹوتی سے طلب بڑھی ہے جس کا فائدہ گاڑیوں اور بائیک بنانے والی کمپنیوں کو ہوا ہے۔ تمل ناڈو کو جی ایس ٹی اصلاحات سے سب سے زیادہ فائدہ ہوا ہے اور جی ایس ٹی کلیکشن بڑھنے سے ریاستوں کو فائدہ پہنچ رہا ہے۔ اپوزیشن کے الزامات مکمل طور پر بے بنیاد ہیں۔
انہوں نے کہا کہ تمل ناڈو کے وزیر اعلیٰ نے خواتین کے تحفظ کے بل کے خلاف بات کی ہے جو کہ انتہائی افسوسناک ہے۔ اس کا تعلق پی ایل آئی اسکیم سے ہے کیونکہ اس کے تحت سب سے زیادہ روزگار خواتین کو ملا ہے۔ انہوں نے الزام لگایا کہ تمل ناڈو حکومت خواتین دشمن ہے۔ وزیر خزانہ نے مزید کہا کہ ان کی حکومت نے چائے کے باغات میں کام کرنے والے مزدوروں کے لیے حوصلہ افزائی سے متعلق اسکیم شروع کی تھی، جس میں آسام حکومت نے 29 کروڑ روپے خرچ کر کے 18 اضلاع کے لاکھوں مزدوروں کو فائدہ پہنچایا، لیکن مغربی بنگال حکومت نے اس اسکیم کو نافذ نہیں کیا۔ مغربی بنگال حکومت کے اس فیصلے کی وجہ سے وہاں کے 3.7 لاکھ چائے کے باغات کے مزدوروں کے ساتھ ناانصافی ہوئی ہے۔ اسی طرح مغربی بنگال حکومت نے ‘آیوشمان بھارت’ کا فائدہ بھی اپنے عوام کو نہیں دیا، جس کی وجہ سے 1.5 کروڑ بنگالی اس اسکیم کے فوائد سے محروم رہے۔
