ہم مختلف فریقین کے ساتھ سفارتی رابطوں اور بیانات کے ذریعے فعال کردار ادا کر رہے ہیں‘وزیر خارجہ کا بیان
’وزیر اعظم نے امریکی صدر پرواضح کیا کہ بھارت جنگ کے خاتمے کا خواہاں ہےکیونکہ یہ سب کو متاثر کر رہی ہے‘
(ویب ڈیسک )
سرینگر؍۲۵مارچ
وزیر خارجہ ایس جے شنکر نے مشرقِ وسطیٰ تنازع میں ثالثی کے معاملے پر پاکستان پر سخت تنقید کرتے ہوئے کہا ہے کہ بھارت کسی بھی صورت میں ’دلال ملک‘ کا کردار ادا نہیں کرے گا۔
این ڈی ٹی وی نے ذرائع کے حالے سے ایک رپورٹ میں کہا کہ دہلی میں منعقدہ آل پارٹی اجلاس کے دوران وزیر خارجہ نے پاکستان کو ’دلال (بروکر) ملک‘ قرار دیتے ہوئے کہا کہ بھارت اس طرزِ عمل کی پیروی نہیں کرے گا۔
یہ بیان ایسے وقت میں سامنے آیا ہے جب پاکستان نے امریکہ اور ایران کے درمیان جاری کشیدگی میں ثالثی کی پیشکش کی ہے۔
رپورٹ کے مطابق واشنگٹن اور اسلام آباد کے درمیان دو طرفہ تعلقات کے تناظر میں ایسی کوششیں کی جا رہی ہیں۔
رپورٹ میں مزید کہا گیا کہ بھارت نے مشرقِ وسطیٰ بحران پر اپنی پالیسی کا دفاع کرتے ہوئے واضح کیا کہ وہ مختلف فریقین کے ساتھ سفارتی رابطوں اور بیانات کے ذریعے فعال کردار ادا کر رہا ہے۔
اجلاس میں یہ بھی بتایا گیا کہ اب تک۴ لاکھ۲۵ ہزار بھارتی شہریوں کو ایران سے واپس لایا جا چکا ہے جبکہ وہاں موجود افراد کے تحفظ کے لیے کوششیں جاری ہیں۔
این ڈی ٹی وی رپورٹ کے مطابق حکومت نے کہا کہ ایران پر امریکی پابندیاں گزشتہ۱۵برس سے نافذ ہیں، تاہم اس کے باوجود بھارت نے اپنی توانائی ضروریات کے پیش نظر ایرانی تیل کی خریداری جاری رکھی۔
حکومت نے یقین دہانی کرائی کہ توانائی کے شعبے میں کسی قسم کی تشویش کی ضرورت نہیں اور ایل پی جی کی فراہمی مستحکم ہو رہی ہے۔ اس موقع پر یہ بھی بتایا گیا کہ بھارت کی خام تیل کی بڑی مقدار روس سے درآمد کی جاتی ہے، جو ایک متوازن حکمت عملی کی عکاسی ہے۔
رپورٹ میں کہا گیا ہے کہ حکومت نے کہا کہ امریکہ بھارت کا سب سے بڑا تجارتی شراکت دار ہے جبکہ اسرائیل ایک اہم تکنیکی اور تزویراتی پارٹنر ہے۔ بھارت مشرقِ وسطیٰ کے تمام ممالک کے ساتھ متوازن تعلقات برقرار رکھے ہوئے ہے، بشمول ایران۔
اجلاس میں یہ بھی کہا گیا کہ بھارت غیر وابستہ تحریک(این اے ایم) کا حصہ ہے، تاہم ایران اور متحدہ عرب امارات کے مختلف مؤقف کے باعث برکس میں مشترکہ موقف اپنانا مشکل ہو گیا ہے۔
بعد ازاں کیرن رجیجو نے کہا کہ آل پارٹی اجلاس میں اٹھائے گئے تمام سوالات کے جوابات دیے گئے اور تمام شرکاء نے اتحاد کا اظہار کیا۔
اس دوران امریکی صدر ڈونلڈ ٹرمپ کی جانب سے وزیر اعظم نریندر مودی کو فون کال کے ایک دن بعد حکومت نے بدھ کے روز سیاسی جماعتوں کے رہنماؤں کو بتایا کہ مودی نے واضح کیا ہے کہ بھارت ’جنگ کے خاتمے کا خواہاں ہے‘ کیونکہ یہ ’سب کو متاثر کر رہی ہے۔‘
دریں اثنا ایران کے سرکاری نشریاتی ادارے پریس ٹی وی کا کہنا ہے کہ تہران نے امریکہ کا۱۵نکاتی مجوزہ مسترد کر دیا ہے اور اپنی شرائط پیش کر دی ہیں۔
پریس ٹی وی کے مطابق اسے ایک سینیئر سیاسی و سکیورٹی عہدیدار نے بتایا ہے کہ ایران صدر ٹرمپ کو اس جنگ کے خاتمے کے وقت کا تعین نہیں کرنے دے گا۔اس عہدیدار کا مزید کہنا تھا کہ ’ایران اس جنگ کا اختتام اپنی مرضی کے وقت پر کرے گا جب اس کی شرائط مان لی جائیں گی۔‘
خیال رہے اس سے قبل متعدد میڈیا اداروں نے رپورٹ کیا تھا امریکہ نے بذریعہ پاکستان ایران کو یہ مجوزہ منصوبہ بھیجا ہے۔
ایرانی نشریاتی ادارے کے مطابق سیاسی و سکیورٹی عہدیدار نے اسے مزید بتایا کہ واشنگٹن متعدد سفارتی ذرائع سے مذاکرات کی کوشش کر رہا ہے اور ایسے پروپوزل پیش کر رہا ہے جو ایران کے نزدیک ’حدود سے تجاوز‘ کر رہے ہیں۔
