پریمیم پٹرول دو روپے فی لیٹر مہنگا

نئی دہلی، 20 مارچ (یواین آئی) تیل مارکیٹنگ کمپنیوں نے جمعہ سے پریمیم پٹرول کی قیمتوں میں دو روپے فی لیٹر اضافہ کر دیا ہے، جبکہ ریٹیل پٹرول اور کسی بھی قسم کے ڈیزل کی قیمتوں میں کوئی تبدیلی نہیں کی گئی ہے۔
ملک کی سب سے بڑی آئل مارکیٹنگ کمپنی انڈین آئل کارپوریشن سے حاصل شدہ معلومات کے مطابق، دہلی کے ارون روڈ سروس اسٹیشن پر آج سے پریمیم پٹرول’ ایکس پی 95‘کی قیمت 101.89 روپے فی لیٹر ہو گئی ہے۔ پہلے اس کی قیمت 99.89 روپے فی لیٹر تھی۔ عام پٹرول کی قیمت 94.77 روپے فی لیٹر اور ڈیزل کی قیمت 87.67 روپے فی لیٹر پر برقرار ہے۔ پریمیم ڈیزل ’ایکس جی‘ کی قیمت بھی 91.49 روپے فی لیٹرہے اور اس میں کوئی تبدیلی نہیں کی گئی ہے۔
انڈین آئل کے علاوہ دیگر کمپنیوں بھارت پٹرولیم اور ہندوستان پٹرولیم نے بھی قیمتوں میں تقریباً اتنا ہی اضافہ کیا ہے۔ طویل عرصے کے بعد کسی بھی قسم کے پٹرول یا ڈیزل کی قیمتوں میں اضافہ ہوا ہے۔ مغربی ایشیا میں جاری بحران کی وجہ سے خام تیل کی سپلائی متاثر ہوئی ہے، جس سے اس کی قیمتیں بڑھی ہیں۔ بڑھی ہوئی لاگت کی تلافی کے لیے آئل مارکیٹنگ کمپنیوں نے پریمیم پٹرول کی قیمتوں میں اضافہ کیا ہے۔