ویب ڈیسک
سرینگر؍۱۴مارچ
محکمۂ موسمیات نے کہا ہے کہ۱۵ سے۲۰ مارچ کے دوران جموں و کشمیر میں بارش اور برفباری کا نیا سلسلہ متوقع ہے، جس سے خطے میں ایک مرتبہ پھر سردی جیسی صورتحال پیدا ہو سکتی ہے۔
محکمۂ موسمیات کشمیر کے ڈائریکٹر ڈاکٹر مختار احمد کے مطابق دو مسلسل مغربی ہوائیں (ویسٹرن ڈسٹربینس) اس عرصے کے دوران جموں و کشمیر کو متاثر کریں گی۔ ان موسمی نظاموں کے باعث میدانی علاقوں میں بارش جبکہ بالائی علاقوں میں تازہ برفباری ہو سکتی ہے۔
ڈاکٹر مختار احمد نے کہا’’۱۵ سے۲۰ مارچ کے درمیان دو مسلسل ویسٹرن ڈسٹربینس جموں و کشمیر کو متاثر کریں گے جس کے نتیجے میں خطے میں وقتی طور پر سردیوں جیسا موسم واپس آ سکتا ہے‘‘۔
انہوں نے بتایا کہ پہلا سلسلہ۱۵؍اور۱۶مارچ کے آس پاس متوقع ہے جبکہ دوسرا موسمی نظام۱۸سے۲۰ مارچ کے درمیان خطے کو متاثر کر سکتا ہے۔ان کے مطابق ۱۵،۱۶مارچ اور پھر۱۸ تا۲۰مارچ کے دوران میدانی علاقوں میں بارش جبکہ بالائی علاقوں میں تازہ برفباری کا امکان ہے۔
محکمۂ موسمیات کے ڈائریکٹر نے کہا کہ بارش اور بادلوں کی موجودگی کے باعث جموں و کشمیر کے مختلف علاقوں میں دن کے درجۂ حرارت میں نمایاں کمی بھی محسوس کی جا سکتی ہے۔
ڈاکٹر مختار نے مزید کہا کہ اس عرصے کے دوران بادلوں کی بڑھتی ہوئی مقدار اور وقفے وقفے سے بارش یا برفباری کا اثر بھی دیکھا جا سکتا ہے۔
ویسٹرن ڈسٹربینس دراصل بحیرۂ روم کے علاقے سے آنے والے موسمی نظام ہوتے ہیں جو موسمِ سرما اور ابتدائی بہار کے دوران برصغیر کے شمال مغربی حصوں میں اکثر بارش اور برفباری کا سبب بنتے ہیں۔
