قدرتی گیس اور ایندھن کی قیمتوں میں اضافہ کا اعلان

منامہ، 30 دسمبر (یو این آئی) حکومت بحرین نے قدرتی گیس اور گاڑیوں کے ایندھن کی قیمتوں میں آئندہ تبدیلیوں کا اعلان کردیا ہے ۔
سرکاری اعلامیے کے مطابق بحرین کی حکومت نے کمپنیوں اور فیکٹریوں کے لیے قدرتی گیس کی قیمتوں میں تبدیلیوں کا اعلان کیا ہے ۔
یہ فیصلہ 2015 میں کیے گئے سابقہ فیصلوں کے ازسرِ نو جائزے اور مقامی و عالمی منڈی کی صورتحال کے تفصیلی تجزیے کے بعد کیا گیا ہے ، تاکہ قیمتوں کو توانائی کے اصل استعمال اور لاگت کے زیادہ قریب لایا جا سکے ۔
جائزے کے بعد یہ فیصلہ کیا گیا کہ کمپنیوں اور فیکٹریوں کے لیے قدرتی گیس کی قیمت میں مرحلہ وار اضافہ کیا جائے گا۔
اعلامیے کے مطابق نئی قیمتوں کا اطلاق جنوری 2026 سے ہوگا، جس کے تحت چار سال تک ہر سال 50 سینٹ کا اضافہ کیا جائے گا۔
رپورٹ کے مطابق حکومت کے اس اقدام کا مقصد مقامی اور عالمی قیمتوں کے درمیان فرق کو کم کرنا، توانائی کے مؤثر استعمال کی حوصلہ افزائی کرنا اور صنعتی اداروں کو قابلِ تجدید توانائی میں سرمایہ کاری کی جانب راغب کرنا ہے ۔
دوسری جانب حکومت نے گاڑیوں کے ایندھن کی قیمتوں کے تعین کے لیے سرکاری اداروں اور کمپنیوں پر مشتمل ایک نئی کمیٹی قائم کرنے کا فیصلہ کیا ہے ، جو ماہانہ بنیادوں پر مقامی ایندھن کی قیمتیں طے کرے گی۔ اس اقدام کا مقصد عالمی قیمتوں میں اتار چڑھاؤ کی عکاسی کے ساتھ ساتھ معاشی کارکردگی کو برقرار رکھنا ہے ۔
یہ کمیٹی ماہانہ بنیادوں پر ایندھن کی مقامی قیمتوں کا تعین کرے گی تاکہ عالمی قیمتوں میں ہونے والی تبدیلیوں کی عکاسی کے ساتھ ساتھ معاشی کارکردگی اور مالی پائیداری کو بھی یقینی بنایا جا سکے ۔
نئے قیمتوں کے نظام کے تحت سپر (98 آکٹین)، پریمیئم (95 آکٹین)، ریگولر (91 آکٹین) اور ڈیزل شامل ہوں گے ۔
حکومت نے واضح کیا ہے کہ بحرینی ماہی گیروں کے لیے ڈیزل پر سبسڈی برقرار رکھی جائے گی۔ ایندھن کی قیمتوں سے متعلق کمیٹی کے ہونے والے اجلاس کے بعد جلد ہی نئی قیمتوں کا باضابطہ اعلان متوقع ہے ۔