۲۰۲۵کشمیر میں شعبہ سیاحت کیلئے انتہائی کٹھن ثابت ہوا

سرینگر/۳۰دسمبر
دنیا بھر کے سیاحوں کی پہلی پسند اور دنیا کے گوشہ و کنار میں اپنے بے مثال قدرتی حسن و جمال کے لئے مشہور وادی کشمیر میں سال۲۰۲۵کے دوران شعبہ سیاحت کو انتہائی کٹھن صورتحال سے دوچار ہونا پڑا۔
گرچہ سال شروع ہونے کے ساتھ ہی وادی کے سیاحتی مقامات پر سیاحوں کی بے تحاشا آمد ایک ریکارڈ سیاحتی سیزن کا عندیہ دے رہی تھی لیکن ماہ اپریل کے آخری ہفتے میں پہلگام کی بیسرن وادی میں پیش آنے والے بہیمانہ واقعے سے اس شعبے کے افق پر ایسی تاریکی سایہ فگن ہوئی جس اس شعبے وابستہ لوگ مایوسی کے صحرا میں گم ہوگئے ۔
جنوبی کشمیر میں واقع مشہور سیاحتی مقام پہلگام کی بیسرن وادی میں۲۲؍اپریل کی دوپہر کو ایک دہشت گردانہ حملے میں۲۵سیاحوں اور ایک مقامی باشندے کی موت واقع ہوئی جس سے جہاں ایک طرف کشمیر کے ساتھ ساتھ پورے ملک پر ماتم کا ماحول چھا گیا وہیں یہ انسانیت سوز واقعہ شعبہ سیاحت کیلئے ایک ایسا کاری ضرب تھا جس سے یہ شعبہ ابھی بھی پوری طرح سے سنبھل نہیں پا رہا ہے ۔
تاہم حکومت اور اس شعبہ سے وابستہ اداروں اور افراد کی مربوط اور متواتر کاوشوں کے نتیجے میں اس شعبہ کے پژ مردہ گلستان میں بہار نو کی ہوا دوبارہ چلنے لگی ہے جس کے پیش نظر موسم سرما میں اچھے سیزن کی امیدیں جاگزیں ہوئی ہیں۔
حکام کے مطابق وادی کے سیاحتی مقامات بالخصوص گلمرگ میں سال نو کی آمد اور متوقع برف باری کے پیش نظر بڑی تعداد میں سیاح آرہے ہیں جو اس شعبے کیلئے ایک امید افزا علامت ہے ۔
سرکاری اعدا و شمار کے مطابق سال۲۰۲۵میں کل ۱۰لاکھ ۶۸ہزار سیاحوں نے کشمیر کے مختلف مقامات کی سیر کی جن میں۴۷ء۱۰لاکھ ملکی جبکہ۲۱ہزار۳۶۱غیر ملکی سیاح شامل ہیں۔.
۲۰۲۴کے دوران قریب۳۵لاکھ سیاح کشمیر آئے تھے جن میں۱۲ء۵لاکھ شری امرناتھ جی یاتری شامل تھے ۔
کشمیر میں ۲۰۲۵میں ماہ بہ ماہ آنے والے سیاحوں کے اعداد و شمار سے پتہ چلتا ہے کہ سال کے ابتدائی مہینوں میں سیاحوں کے آمد کی رفتار تیز گام تھی جو پہلگام حملے کے بعد مدھم ہونے لگی۔
سرکاری اعداد و شمار کے مطابق ماہ جنوری میں۴۸ء۱لاکھ ملکی اور۳۳۸۵غیر ملکی سیاح کشمیر آئے جبکہ ماہ فروری میں۳۴ء۱لاکھ ملکی اور۴۱۱۶غیر ملکی سیاحوں کی آمد ریکارڈ کی گئی۔
ماہ مارچ میں۷۴ء۱لاکھ ملکی اور۲۰۰۶غیر ملکی سیاح جبکہ ماہ اپریل میں تقریباً ۷۵ء۱لاکھ ملکی اور۴۱۴۵غیر ملکی سیاحوں کا اندراج ہوا۔
تاہم پہلگام کے بائسرن علاقے میں۲۲ اپریل کو پیش آنے والے دہشت گردانہ حملے کے بعد وادی میں سیاحتی نقل و حرکت میں نمایاں کمی واقع ہوئی۔
مئی وہ مہینہ تھا جس میں سب سے زیادہ کمی ریکارڈ ہوئی، اور صرف۱۸ہزار سے زائد ملکی اور۶۰۷غیر ملکی سیاح ہی وادی پہنچ سکے ۔ جون اور جولائی میں صورتحال قدرے بہتر ہوئی، مگر بحالی کی رفتار سست رہی۔ اگست اور ستمبر میں سیاحتی آمد میں مزید اتار چڑھاؤ نظر آیا، جبکہ اکتوبر اور نومبر میں حالات نسبتاً بہتر رہے ۔
اعداد و شمار کے مطابق دسمبر کے وسط تک وادی میں۲۲ہزار۸۲۹ملکی اور۵۱۹غیر ملکی سیاحوں کی آمد ریکارڈ کی گئی۔
اس دوران جموں خطے میں مذہبی سیاحت کا تسلسل سال بھر جاری رہا۔ ماتا ویشنو دیوی کی مقدس مندر تک اس سال۶۳لاکھ سے زائد یاتریوں نے درشن کیے ۔ شیو کھوری سمیت دیگر مذہبی مقامات نے بھی لاکھوں زائرین کو اپنی طرف متوجہ کیا، جس کے باعث جموں کا مجموعی سیاحتی تاثر نہ صرف برقرار رہا بلکہ کئی لحاظ سے مضبوط بھی ہوا۔
دستیاب سرکاری اعداد و شمار کے مطابق، دسمبر ۲۶تک جموں خطے میں کل ایک کروڑ۴۷لاکھ۳۲ہزار۵۵۲ سیاحوں نے سفر کیا، جن میں۱۲ہزار۸۸۹غیر ملکی بھی شامل تھے ۔
جموں و کشمیرنے سال۲۰۲۵کے دوران مجموعی طور پر ایک کروڑ۵۸لاکھ سے زائد سیاحوں اور یاتریوں کی میزبانی کی، تاہم یہ تعداد گزشتہ برس کے ریکارڈ۳۶ء۲کروڑ کے مقابلے میں کچھ کم رہی۔
سیاحوں اور اس شعبہ سے وابستہ دیگر افراد کے تحفظ کے پیش نظر حکومت نے پہلگام واقعے کے فوراً بعد۲۹ اپریل کو وادی کے۸۷میں سے۴۸سیاحتی مقامات کو سکیورٹی خدشات کے پیش نظر بند کر دیاان میں کئی مقامات جیسے درنگ، دودھ پتھری، آرہ وادی، گلمرگ کے بالائی علاقے ، یانر ریفٹنگ پوائنٹ، اکڑ پارک اور پادشاہی پارک شامل تھے ، جنہیں اگلے کئی ماہ تک سیاحوں کے لیے بند رکھا گیا۔ تاہم، بڑے مراکز جیسے ڈل جھیل، گلمرگ، سونمرگ اور پہلگام ٹاؤن کو کھلا رکھا گیا۔
تاہم بعد ازاں حفاظتی جائزوں کے بعد جون سے مختلف مقامات کو مرحلہ وار کھولا گیا اور ستمبر تک۷سے۱۲ مقامات کو مکمل طور پر دوبارہ سیاحوں کے لیے کھول دیا گیا، تاہم بائسران جیسے مقامات ہنوز بند ہیں۔
۲۰۲۵کے آخری مہینے میں سیاحت کے لیے ایک بڑا موقع ۱۷ویں ایڈونچر ٹور آپریٹرز ایسوسی ایشن آف انڈیا کنونشن کی میزبانی تھی، جو۱۷سے۲۰دسمبر تک سری نگر میں منعقد ہوا۔ اس کنونشن میں ہندوستان بھر سے ایڈونچر ٹور آپریٹرز نے شرکت کی اور کشمیر کے ایڈونچر ٹورازم کو’انڈیا کا ایڈونچر کیپیٹل‘قرار دیتے ہوئے نئی حکمت عملی وضع کی۔یو این آئی