میگھالیہ کے بی جے پی لیڈر نے متنازعہ تقریب پر گوا کے وزیر اعلی پرمود ساونت سے کارروائی کا مطالبہ کیا

شیلانگ، 28 نومبر (یو این آئی) میگھالیہ کے سابق وزیر اور بھارتیہ جنتا پارٹی (بی جے پی) کے سینئر لیڈر الیگزینڈر لالو ہیک نے گوا کے وزیر اعلیٰ پرمود ساونت سے جنسی رومانس کو کرسمس سے جوڑنے والے پروگرام کے منتظمین کے خلاف کارروائی کرنے کا مطالبہ کیا ہے ۔
مسٹر الیگزینڈر لالو ہیک نے مسٹر پرمود ساونت کو خط لکھا ہے ، جس میں ان سے اس بات کو یقینی بنانے کی درخواست کی گئی کہ "کام سوتر کی کہانیاں اور کرسمس کا جشن” کے عنوان سے ثقافتی تقریب ان کی ریاست میں منعقد ہو رہی ہے اور وہ اس کے خلاف کارروائی کریں۔
مسٹر الیگزینڈر لالو ہیک نے کہا کہ اس تقریب کا پوسٹر بھگوان رجنیش فاؤنڈیشن کے نام سے جاری کیا گیا ہے ۔ خط میں کہا گیا ہے ، "‘کام سوترکی کہانیاں اور کرسمس کا جشن’ کے عنوان سے منعقد ہونے والی تقریب کے اشتہار میں فحش اور بیہودہ تصاویر شائع کی گئی ہیں، یہ معاشرے میں خاص طور پر عیسائی برادری میں ناقابل قبول ہے ۔”
واضح رہے کہ گوا میں چار روزہ پروگرام کا اعلان ہوتے ہی انتظامیہ کو تنقید کا سامنا کرنا پڑا اور بالآخر پولس کو مداخلت کرنی پڑی۔ گوا پولس نے سوشل میڈیا پلیٹ فارم ایکس پر پوسٹ کیا کہ انہوں نے منتظمین کو اس پروگرام کو منسوخ کرنے کی ہدایت دی ہے ۔ انہوں نے تقریب سے متعلق تمام آن لائن اشتہارات کو ہٹانے کا بھی حکم دیا۔