پاکستان کے دورہ سری لنکا کا ممکنہ پروگرام سامنے آگیا

لاہور 28 نومبر(یو این آئی ) پاکستان کے ٹی 20 سیریز کے لیے دورہ سری لنکا کا ممکنہ شیڈول سامنے آگیا۔ پاکستان اور سری لنکا کے درمیان ممکنہ طور پر تین ٹی 20 میچوں پر مشتمل سیریز 8 سے 12 جنوری 2026ء میں دمبولا کرکٹ اسٹیڈیم میں کھیلی جائے گی۔
ٹی 20 ورلڈ کپ میں پاکستانی ٹیم اپنے تمام میچز سری لنکا میں کھیلے گی اس لحاظ سے یہ سیریز اہم قرار دی جارہی ہے۔
یہ سیریز پاکستان کو ورلڈ کپ سے چند ہفتے قبل مقامی حالات میں میچ پریکٹس فراہم کرے گی جس سے ٹیم کو کمبی نیشن کو ٹھیک کرنے اور میگا ایونٹ کے دوران ان پچز پر کھیلنے کا تجربہ ہوجائے گا۔
پاکستان اور سری لنکا کرکٹ بورڈ کے درمیان سیریز کے لیے گفتگو جاری ہے اور بہت جلد باضابطہ اعلان کیا جائے گا۔
ورلڈ کپ کی تیاری کے لیے کولمبو کے آر پریماداسا سٹیڈیم اور پالی کیلے انٹرنیشنل کرکٹ سٹیڈیم دونوں میں تزئین و آرائش کے جاری کام کی وجہ سے تینوں میچ دمبولا میں شیڈول ہیں۔ واضح رہے کہ پاکستان، سری لنکا اور زمبابوے کے مابین سہ ملکی ٹی 20 سیریز پاکستان میں جاری ہے اور سری لنکا کی ٹیم زمبابوے کو باہر کرکے فائنل میں پہنچ گئی ہے۔