جموں کے پولیس اسٹیشن باہو فورٹ میں درج ایک مقدمے میں اہم مشتبہ گرفتار:پولیس

جموں/۲۷نومبر
جموں پولیس نے بٹھنڈی میں مقیم ضلع ریاسی کے ایک۱۹سالہ نوجوان کو حراست میں لیا ہے جو پولیس اسٹیشن باہو فورٹ میں درج ایک مقدمے میں ایک اہم مشتبہ کے طور پر سامنے آیا ہے ۔
ایک پولیس ترجمان نے بتایا کہ جموں پولیس نے ایک۱۹سالہ نوجوان کو گرفتار کیا ہے جو بینادی طور پر ضلع ریاسی کا رہنے والا ہے اور اس وقت بٹھنڈی میں مقیم ہے ۔
ترجمان نے کہا کہ یہ نوجوان پولیس اسٹیشن باہو فورٹ میں بی این ایس کی متعلقہ دفعات کے تحت درج ایف آئی زیر نمبر۲۰۲۵/۳۳۱میں ایک اہم مشتبہ کے طور پر سامنے آیا ہے ۔
ترجمان نے بتایا’’ابتدائی تفتیش سے معلوم ہوا ہے کہ ملزم کو آن لائن شدت پسندی کی طرف مائل کیا جا رہا تھا اور وہ مبینہ طور پر کوئی دہشت گردانہ کارروائی انجام دینے کی منصوبہ بندی کر رہا تھا‘‘۔
انہوں نے کہا’’یہ بھی سامنے آیا ہے کہ وہ موبائل فون کے ذریعے پاکستان اور دیگر غیر ملکی ممالک میں موجود کچھ نمبروں سے رابطے میں تھا‘‘۔
ترجمان کا کہنا ہے کہ ملزم کے ڈیجیٹل آلات ضبط کر لئے گئے ہیں جن کی جانچ اور تجزیہ کیا جا رہا ہے اور ملزم سے تفصیلی پوچھ گچھ اور جامع تفتیش جاری ہے ۔