میناکشی، پریتی اروندھتی اورنوپور نے جیتے سونے کے تمغے

گریٹر نوئیڈا، 20 نومبر (یو این آئی ) ہندوستان کی باکسر خواتین نے ورلڈ باکسنگ کپ فائنلز 2025 میں شاندار اور تاریخی کارکردگی دکھاتے ہوئے ملک کا سر فخر سے بلند کر دیا۔ شَہید وِجے سنگھ پَتھِک اسپورٹس کمپلیکس میں کھچا کھچ بھرے اسٹیڈیم کے سامنے میناکشی (48 کلو)، پریتی (54 کلو)، اروندھتی چودھری (70 کلو)، اورنوپور (80 کلو) نے سونے کے تمغے اپنے نام کیے۔
یہ کامیابیاں اُن کی ان ویٹ کیٹیگریز میں حاصل ہوئیں جو 2028 اولمپکس کا حصہ ہیں۔ اس طرح ہندوستان نے عالمی سطح پر اپنی بڑھتی ہوئی طاقت اور برابری کی جانب بڑھتے باکسنگ ڈھانچے کو واضح طور پر پیش کیا۔خواتین کے علاوہ ہندوستان کے مرد باکسرز نے بھی بہترین کارکردگی دکھائی۔ جدو مَنی سنگھ، پون برتوال، ابھیناش جاموال اور انکُش فَنگَل نے سلور میڈل جیتے، جس سے یہ ثابت ہوتا ہے کہ مرد اور خواتین دونوں اولمپک کلاس ویٹ کیٹیگریز میں ہندوستان مضبوطی سے اپنی جگہ بنا رہا ہے۔
سیشن 7 میں ہندوستان کے مزید 7 کھلاڑی سونے کے تمغے کیلئے رِنگ میں اتریں گے، جن میں جیسمن لیمبوئیرا، نکہت زرین اور ہیتیش گلیّا شامل ہیں۔
میناکشی نے ازبکستان کی ایشین چیمپئن فرزونا فوزیلوا کو 5-0 سے شکست دی۔انہوں نے ابتدا سے ہی رفتار، درستگی اور جارحانہ اسٹائل سے مقابلے پر غلبہ برقرار رکھا۔پریتی نے اٹلی کی میڈلسٹ سیرِن چرّابی کو یک طرفہ مقابلے میں 5-0 سے ہرایا۔انہوں نے مسلسل دباؤ، چست قدموں اور بہترین اٹیک سے میچ پر مکمل کنٹرول رکھا۔اروندھتی چودھری نے 18 ماہ بعد واپسی کرتے ہوئے ازبکستان کی عزیزہ زوکیروا کو 5-0 سے ہرا کر سب کو متاثر کیا۔ان کا اٹیک، دفاع اور جیتنے کی حکمت عملی پورے میچ میں نمایاں رہی۔نُوپُور نے ایک سنسنی خیز میچ میں سوتیمبوئیوا اولتینوی (ازبکستان) کو 3-2 سے شکست دے کر ہندوستان کیلئے چوتھا سونے کا تمغہ جیتا۔