شمالی فوج کے کمانڈر کا پونچھ میں سیکورٹی انتظامات کا جائزہ

پونچھ/۲۱ نومبر
شمالی فوج کے کمانڈر لیفٹیننٹ جنرل پرتیک شرما نے جمعہ کو پونچھ کے شاہ سیتار علاقے کا دورہ کیا، جہاں انہوں نے مجموعی سیکورٹی صورتحال اور آپریشنل تیاریوں کا جائزہ لیا۔
انہیں علاقے میں جاری دہشت گردی مخالف کارروائیوں اور سیکورٹی حصار کو مزید مضبوط بنانے سے متعلق اقدامات پر تفصیلی بریفنگ دی گئی۔
دورے کے دوران کمانڈر نے فوجی افسران اور سپاہیوں کے ساتھ تبادلہ خیال بھی کیا اور زمینی سطح پر درپیش چیلنجوں، گھنے جنگلاتی علاقوں میں آپریشن کے تقاضوں، اور سرحدی اضلاع میں موجود خطرات کا باریک بینی سے جائزہ لیا۔ انہوں نے اس بات پر زور دیا کہ بدلتے حالات میں جدید نگرانی کے نظام، تیز رسائی والے دستوں اور بین ایجنسی تال میل کو مزید بہتر بنانا وقت کی ضرورت ہے تاکہ دشمن کے کسی بھی عزائم کو ابتدا ہی میں ناکام بنایا جا سکے۔
لیفٹیننٹ جنرل پرتیک شرما نے علاقے میں تعینات اہلکاروں کی ہمت افزائی کرتے ہوئے ان کی پیشہ ورانہ مہارت، مسلسل چوکنّے رہنے اور مشکل موسمی و جغرافیائی حالات کے باوجود اعلیٰ کارکردگی کو سراہا۔ انہوں نے کہا کہ پونچھ اور راجوری جیسے حساس علاقوں میں فورسز کی یہ لگن امن کے قیام کے لیے نہایت اہم ہے۔ایجنسیز
۔۔۔۔۔۔۔۔