یوراج سندھو کو تیسرے راؤنڈ میں چھ شاٹس کی شاندار برتری

ڈِگبوئی (آسام)، 20 نومبر (یو این آئی ) پی جی ٹی آئی رینکنگ میں سرفہرست ہندوستانی گولفر یوراج سندھو نے جمعرات کو شاندار کارکردگی پیش کرتے ہوئے انڈین آئل سرو ماسٹرز 2025 کے تیسرے راؤنڈ کے بعد مجموعی 16 اَنڈر 200 کا اسکور بناتے ہوئے چھ شاٹس کی واضح برتری حاصل کرلی۔
یوراج، جنہوں نے پہلے دو راؤنڈز میں دو اسٹروک کی برتری بنائی تھی، نے تیسرے راؤنڈ میں بغیر کسی غلطی کے 6 اَنڈر 66 اسکور کیا اور اپنی برتری مزید مضبوط کر لی۔ 28 سالہ یوراج اب ڈگبوئی میں اپنی تیسری جیت اور اس سیزن کے پانچویں خطاب کی جانب بڑھے رہے ہیں۔
آخری دن یوراج کا مقابلہ ویراج مداپّا سے ہوگا، جو پہلی بار ڈگبوئی میں کھیل رہے ہیں اور ابھی 10 اَنڈر 206 کے ساتھ دوسرے نمبر پر ہیں۔ مداپّا نے 68 کا راؤنڈ کھیل کر تیسرے سے اٹھ کر دوسرے نمبر پر جگہ بنائی۔سری لنکا کے این تھنگاراجا (67) اور سابق چیمپئن ویر اہلاوت (69) دونوں 9 اَنڈر 207 کے ساتھ مشترکہ طور پر تیسرے مقام پر رہے۔ڈگبوئی کے مقامی گولفر دیون بھومِج، جو کٹ کنڈیشن عبور کرنے والے واحد لوکل پروفیشنل ہیں، نے 73 کے اسکور کے بعد چار اوور 220 کے ساتھ 42واں مقام حاصل کیا۔