بالائی علاقوں میں۲/۳دسمبر کو ہلکی برفباری کا امکان

سرینگر/۲۰ نومبر
محکمہ موسمیات مرکز سرینگر نے جمعرات کو جاری اپنی تازہ ایڈوائزری میں کہا کہ جموں و کشمیر کے دور افتادہ بالائی علاقوں میں ۲سے۳ دسمبر کے دوران بہت ہلکی برفباری کے مختصر وقفے کا امکان ہے۔
محکمہ کے مطابق ۲۲نومبر کے بعد زیادہ سے زیادہ اور کم سے کم درجہ حرارت میں مزید ایک سے د۲ ڈگری سینٹی گریڈ کی کمی متوقع ہے۔
حکام نے بتایا کہ خطے میں موجودہ خشک موسم کا سلسلہ یکم دسمبر تک برقرار رہنے کا امکان ہے۔انہوں نے کہا کہ ۲ سے۳ دسمبر کے دوران دوپہر کے وقت موسم ابر آلود رہنے کا امکان ہے اور بالائی علاقوں میں کہیں کہیں بہت ہلکی برفباری ہو سکتی ہے۔ اس کے بعد ۱۰ دسمبر تک موسم خشک رہنے کی توقع ہے۔
حکام کے مطابق ’’کشمیر کے کئی مقامات اور جموں کے چند ایک علاقوں میں ہلکے سے درمیانے درجے کے دھند کے امکانات برقرار رہیں گے۔ ساتھ ہی ۲۲ نومبر کے بعد زیادہ سے زیادہ اور کم سے کم درجہ حرارت میں ۱ تا۲ ڈگری سینٹی گریڈ کی مزید گراوٹ متوقع ہے۔‘‘
محکمے نے ایک ایڈوائزری میں کہا کہ کشمیر کے کئی علاقوں میں اور جموں صوبے کے کچھ حصوں میں صبح اور شام کے وقت ہلکی دھند چھائی رہ سکتی ہے ۔
ادھر وادی میں شبانہ سردیوں کا زور جاری ہے جس سے لوگ گوناگوں مشکلات سے دوچار ہیں۔گرمائی دارلحکومت سری نگر میں کم سے کم درجہ حرارت منفی۲ء۰ڈگری سینٹی گریڈ ریکارڈ ہوا ہے ۔
سیاحتی مقام پہلگام میں کم سے کم درجہ حرارت منفی۰ء۲ڈگری سینٹی گریڈ جبکہ گلمرگ میں شبانہ درجہ حرارت ۸ء۱ڈگری سینٹی گریڈ ریکارڈ ہوا ہے ۔
شمالی ضلع کپوارہ میں کم سے کم درجہ حرارت منفی۶ء۱ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں شبانہ درجہ حرارت منفی۷ء۰ڈگری سینٹی گریڈ ریکارڈ کیا گیا۔یو این آئی