گینگسٹر انمول بشنوئی کو امریکہ سے لائے جانے پر این آئی اے نے گرفتار کیا

نئی دہلی، 19 نومبر (یو این آئی) قومی تحقیقاتی ایجنسی (این آئی اے ) نے بدھ کے روز بدنام زمانہ گینگسٹر لارنس بشنوئی کے بھائی انمول بشنوئی کو امریکہ سے حوالگی کے بعد دہلی کے آئی جی آئی ہوائی اڈے پر اُترتے ہی گرفتار کر لیا۔
انمول بشنوئی پر قتل، اغوا اور جبراً وصولی جیسے سنگین الزامات ہیں اور وہ طویل عرصے سے فرار تھا۔ سال 2022 سے مفرور اور امریکہ میں مقیم انمول بشنوئی، جیل میں بند اپنے بھائی لارنس بشنوئی کی سربراہی والے دہشت گرد سنڈیکیٹ میں شامل ہونے کے الزام میں گرفتار ہونے والا 19 واں ملزم ہے ۔
تحقیقات کے بعد یہ بات ثابت ہوئی کہ انمول بشنوئی نے 2020 سے 2023 کے درمیان نامزد دہشت گرد گولڈی بَرار اور لارنس بشنوئی کو ملک میں مختلف دہشت گردانہ کارروائیاں انجام دینے میں مدد فراہم کی تھی۔ این آئی اے نے مارچ 2023 میں انمول بشنوئی کے خلاف چارج شیٹ داخل کی تھی۔
قابل ذکر ہے کہ انمول بشنوئی پر سدھو موسے والا اور نیشنلسٹ کانگریس پارٹی (این سی پی) کے لیڈر بابا صدیقی قتل معاملہ اور بالی وُوڈ اداکار سلمان خان کے گھر کے باہر فائرنگ جیسے سنگین کیس بھی درج ہیں۔ این آئی اے نے اس پر دس لاکھ روپے کا انعام رکھا تھا۔
انمول پر کل 18 مقدمات درج ہیں، جن میں جبراً وصولی، قتل اور اسلحہ اسمگلنگ شامل ہیں۔
این آئی اے اس معاملے (لارنس بشنوئی کی سربراہی والے دہشت گرد-گینگسٹر سازش کیس) کی تحقیقات کر رہی ہے تاکہ دہشت گردوں، گینگسٹرز اور اسلحہ اسمگلروں کے درمیان گٹھ جوڑ کو ختم کیا جا سکے ۔