نئی دہلی، 18 نومبر (یو این آئی) ہندوستان اور روس نے باہمی اعتماد، احترام اور طویل مدتی اقتصادی و اسٹریٹجک تعاون کے مشترکہ وژن پر مبنی اپنی گہری، پائیدار اور خصوصی اسٹریٹجک شراکت داری کی توثیق کرتے ہوئے بحری شعبے میں تعاون کو مزید مضبوط بنانے کا عزم ظاہر کیا ہے ۔
ایک سرکاری ترجمان نے منگل کو بتایا کہ پیر کی دیر رات منعقدہ اعلیٰ سطحی بین ایجنسی میٹنگ میں دونوں ممالک نے زیادہ مضبوط، مؤثر اور پائیدار بحری شراکت داری قائم کرنے کا عہد کیا جو دونوں کی طویل مدتی خوشحالی میں اضافہ کرے گی اور علاقائی و عالمی رابطہ کاری کو بھی تقویت پہنچائے گی۔
میٹنگ میں ی وفد کی قیادت بندرگاہ، جہازرانی و آبی گزرگاہوں کے وزیر سربانند سونوال نے کی، جبکہ روسی وفد کی قیادت روسی صدر ولادیمیر پوتن کے معاون اور روسی میری ٹائم بورڈ کے چیئرمین نکولائی پاتروشِیف نے کی۔
دونوں فریقوں نے باہمی بحری تعاون کے وسیع دائرہ کار کا جائزہ لیا۔ انہوں نے جہاز سازی، تجارت، اقتصادی، سائنسی اور تکنیکی تعاون سمیت ممکنہ اشتراک کے مختلف پہلوؤں پر بھی تبادلۂ خیال کیا۔
ترجمان نے کہا کہ دونوں جانب نے جامع اور دوراندیش مذاکرات پر اطمینان کا اظہار کرتے ہوئے جہاز سازی، بندرگاہوں کی ترقی، بحری لاجسٹکس، آرکٹک آپریشنز، تحقیق اور تربیت کے شعبوں میں تعاون کو مزید گہرا کرنے کے عزم کی توثیق کی۔
