’اس سال اب تک ۲۵۵ پاکستانی ڈرون مار گرائے گئے‘

چندی گڑھ/۱۸ نومبر
بارڈر سیکیورٹی فورس (بی ایس ایف) نے اس سال اب تک۲۵۵ ڈرون مار گرائے ہیں، جو پاکستان سے ہیروئن اور اسلحہ اسمگل کرنے کے لیے آتے تھے، پنجاب فرنٹیئر کے ایک سینئر بی ایس ایف اہلکار نے بتایا۔
عہدیدار نے مزید کہا کہ بی ایس ایف نے دھند کے موسم کے پیش نظر سرحد پار سے اسمگلنگ کی سرگرمیوں کو روکنے کے لیے نگرانی کو مضبوط کیا ہے۔
بی ایس ایف کے انسپکٹر جنرل اتل فْلزیلے نے ذکر کیا کہ دھند کے دوران حدِ نگاہ کم ہو جاتی ہے، جس کا فائدہ اسمگلرز ڈرون کے ذریعے اٹھا سکتے ہیں۔انہوں نے کہا’’ہم نے اس مسئلے سے نمٹنے کے لیے ضروری انتظامات کر لیے ہیں۔ دھند کے دوران خصوصی نگرانی کے آلات استعمال کیے جائیں گے، اور ہم دریا کے کنارے والے علاقوں کی سخت نگرانی برقرار رکھیں گے، جس سے پوری نگرانی کے جال کو مزید مضبوط بنایا جائے گا‘‘۔
انہوں نے یہ بھی بتایا کہ بی ایس ایف کے اہلکار اْن افراد پر نظر رکھیں گے جو سرحدی علاقوں میں ڈرون کے ذریعے پھینکے گئے سامان کو اْٹھانے کے لیے پہنچتے ہیں۔
اسمگلنگ کو روکنے کے لیے بی ایس ایف اور پنجاب پولیس کے اہلکار سرحدی علاقوں کی طرف جانے والی سڑکوں پر مشترکہ چیکنگ کریں گے۔ انہوں نے کہا’’ہم یہ ہر سال کرتے ہیں اور اس بار بھی کریں گے‘‘۔انہوں نے کہا’’اب تک بی ایس ایف نے پاکستان سے آنے والے ۲۵۵ ڈرون مار گرائے ہیں‘‘۔
چند روز قبل بی ایس ایف نے کہا تھا کہ اس نے ۲۵۱ ڈرونز کو کامیابی سے روکا تھا۔ اس نے ۱۴نومبر تک ۳۲۹ کلو ہیروئن، ۱۶کلو آئس (میتھ ایمفیٹامین)، ۱۹۱؍اسلحے،۱۲ ہینڈ گرینیڈ اور ۱۰ کلو سے زیادہ بارودی مواد برآمد کیا ہے۔
بی ایس ایف نے تین پاکستانی دراندازوں کو بھی ہلاک کیا اور سرحد پار جرائم میں ملوث۲۴۰بھارتی اسمگلرز اور ۱۹پاکستانی شہریوں کو گرفتار کیا، اس نے کہا۔
پیر کو بی ایس ایف نے فیروز پور کے علاقے متھیاؤالا گاؤں کے نزدیک۹؍ایم ایم کارتوس کے۵۰ راؤنڈ بھی برآمد کرنے کا اعلان کیا۔ (ایجنسیاں)