جموں میں مویشی چوری کا معاملہ حل ۴گرفتار‘ چوری شدہ مویشی بر آمد:پولیس

جموں/۱۰نومبر
جموں کشمیر پولیس نے جموں کے اکھنور علاقے میں مویشی چوری کے ایک مقدمے کو حل کرکے چار ملزموں کو گرفتار کیا ہے اورچوری شدہ مویشیوں کو بھی بر آمد کیا ہے ۔
ایک پولیس ترجمان نے بتایا کہ ۳۱؍اکتوبر۲۰۲۵کو پولیس اسٹیشن اکھنور میں کشمیری محلہ اکھنور سے مویشیوں کی چوری کے بارے میں ایک تحریری شکایت موصول ہوئی جس کے مطابق بی این ایس کی دفعہ ۳۰۳کے تحت زیر ایف آئی آر نمبر۲۰۲۵/۲۰۱؍ایک مقدمہ درج کیا گیا۔
انہوں نے کہا کہ اس کے بعد ملزموں کی تلاش کے لئے ایک خصوصی پولیس ٹیم تشکیل دی گئی۔ ان کا کہنا ہے کہ اس پولیس ٹیم نے فوری کارروائیاں شروع کیں،نزدیکی علاقوں میں سی سی ٹی وی فوٹیج کا تجزیہ کیا گیا اور مقامی وسائل کو متحرک کر دیا گیا۔
پولیس ترجمان نے بتایا کہ مسلسل کوششوں، تکنیکی تجزیے اور تعاقب کے بعد چار مشتبہ افراد کی شناخت کی گئی اور ان کو گرفتار کیا گیا۔
گرفتار شدہ ملزموں کی شناخت میڈو ولد کاکا ساکن راج پورہ منڈی جموں، فاروق خان ولد مرزا خان ساکن راج پورہ منڈی جموں، محمد صابر ساکن ڈب کرم دین جموں اورمقدر علی ولد عبدالحمید ساکن ماوا کروڈہ اکھنور کے طور پر کی گئی۔
انہوں نے کہا کہ تفتیش کے دوران ملزموں نے اپنے جرم کا اعتراف کیا اور اس کے بعد اس جرم میں استعمال ہونے والے ٹاٹا موبائل ضبط کر لیا گیا اور ملزموں کے انکشاف پر چوری شدہ مویشی بھی بر آمد کر لئے گئے ۔
ان کا کہنا ہے کہ اس ضمن میں تفتیش ابھی بھی جاری ہے اور ملزموں سے پوچھ تاچھ کی جارہی ہے تاکہ ان کے دیگر اس طرح کے مقدمات میں ملوث ہونے کی بھی جانچ کی جا سکے ۔