نئی دہلی، 10 نومبر (یو این آئی) قومی انسانی حقوق کمیشن نے بہار کے سمستی پور میں راشٹریہ جنتا دل کے ایک لیڈر کے مبینہ طور پر ذات پات سے متعلق توہین آمیز الفاظ اور نفرت انگیز زبان کے استعمال والی وائرل ویڈیو کے پیش نظر چیف الیکشن کمشنر اور ضلعی انتظامیہ کو نوٹس جاری کرتے ہوئے معاملے کی تحقیقات کا حکم دیا ہے ۔
کمیشن کا کہنا ہے کہ اگر وائرل ویڈیو حقیقت پر مبنی ہے تو یہ انسانی حقوق کی سنگین خلاف ورزی ہے ۔ کمیشن نے ویڈیو کی جانچ کے لیے ضلع مجسٹریٹ، پولیس سپرنٹنڈنٹ اور دیگر افسران کو نوٹس جاری کر کے دو ہفتوں میں جواب طلب کیا ہے ۔
کمیشن نے پیر کو سمستی پور کے ضلع مجسٹریٹ، پولیس سپرنٹنڈنٹ ساتھ ہی بہار کے چیف الیکٹورل افسر اور چیف الیکشن کمشنر کو نوٹس بھیج کر کہا ہے کہ سمستی پور کی ایک ریلی میں آر جے ڈی لیڈر کی وائرل ویڈیو ذات پات پر مبنی امتیاز اور نفرت پھیلانے کے ساتھ نابالغوں کے خلاف جرائم کو بڑھاوا دینے والی ہے ۔
کمیشن کا کہنا ہے کہ اگر یہ درست ہے تو یہ انتہائی سنگین معاملہ ہے اور اس کی فوری آزادانہ تحقیقات کے احکامات دیے جانے چاہئیں۔ کمیشن نے نوٹس پر دو ہفتوں کے اندر کارروائی رپورٹ جمع کرنے کو کہا ہے ۔
