سعودی عرب میں گاڑی چلانے والوں کو ٹریفک پولیس کا انتباہ

ریاضم، 25 اکتوبر (یو این آئی) سعودی عرب میں ٹریفک پولیس نے کہا ہے کہ خطرناک انداز میں تیز رفتاری سے گاڑی چلانا اور مقررہ ضوابط کا خیال نہ رکھنا سلامتی کو خطرے میں ڈالنے والی خلاف ورزی میں شمار کیا جائے گا۔
سعودی خبر رساں ایجنسی کی رپورٹ کے مطابق ٹریفک پولیس نے اپنے ایکس اکاونٹ پر انتباہ دیا ہے کہ قوانین پر عمل نہ کرنے والوں کے خلاف سخت تادیبی کارروائی کی جاتی ہے ۔
رپورٹس کے مطابق ٹریفک پولیس کا کہنا ہے کہ گاڑیوں کے درمیان خطرناک انداز میں ڈرائیونگ کرتے ہوئے زیک زیگ کراسنگ کرنا سنگین نوعیت کے حادثے کا سبب بن سکتا ہے جس سے نہ صرف اس عمل کا مرتکب ہونے والا بلکہ دوسروں کی زندگیاں بھی خطرے میں پڑ سکتی ہیں۔
ٹریفک پولیس کے مطابق قوانین پر عمل کرنا ہر ایک کی ذمہ داری ہے ۔ ضوابط لوگوں کی سلامتی اور تحفظ کو یقینی بنانے کے لیے وضع کیے جاتے ہیں۔ شاہراہوں پر مقررہ حد رفتار کی پابندی نہ کرنا خلاف ورزی ہے جس پر چالان کیا جاتا ہے ۔
یاد رہے کہ گزشتہ ماہ سعودی عرب میں ٹریفک پولیس کی جانب سے سنگین خلاف ورزیوں پر سخت سزاؤں کا اعلان کیا گیا تھا۔
اس ضمن میں وزرا کونسل نے ٹریفک نظام کی دفعہ 74 میں کی جانے والی ترمیم کی بھی منظوری دی تھی جس میں عوامی سلامتی کے لیے خطرناک خلاف ورزیوں کے مرتکب کو ایک برس تک قید اور غیرملکی ہونے کی صورت میں اسے بے دخل کیا جانا شامل تھا۔
رپورٹس کے مطابق ٹریفک پولیس نے اس حوالے سے یاددہانی کرائی ہے کہ گاڑیوں کے درمیان خطرناک انداز میں گاڑی چلانے سے دوسروں کی جانوں کو بھی خطرہ لاحق ہو سکتا ہے جو عوامی سلامتی کے لیے خطرناک تصور کیا جاتا ہے ۔