ٹرمپ کا وینزویلا کے خلاف زمینی کارروائی کا فیصلہ

واشنگٹن، 24 اکتوبر (یو این آئی) امریکی صدر ڈونلڈ ٹرمپ نے وینزویلا کے خلاف جلد زمینی کارروائی کرنے کا اعلان کردیا ہے ۔
بین الاقوامی خبر رساں ادارے کی رپورٹ کے مطابق وائٹ ہاؤس میں تقریب سے خطاب میں ڈونلڈ ٹرمپ نے کہا کہ وہ مختلف وجوہات کی بنیاد پر وینزویلا سے خوش نہیں ہیں۔
رپورٹس کے مطابق امریکی صدر کا کہنا تھا کہ منشیات اسمگلرز کے خلاف اعلان جنگ کی ضرورت نہیں، جو لوگ امریکہ منشیات لارہے ہیں ہم انہیں ختم کردیں گے ۔
اُنہوں نے کہا کہ وہ سمندر کے راستے امریکہ میں منشیات کا داخلہ روکنے کے لیے اقدامات اُٹھا رہے ہیں، تاہم وینزویلا کے قریب بی ون بمبار طیاروں سے متعلق رپورٹس صحیح نہیں ہیں۔
صدر ٹرمپ نے دعویٰ کیا کہ کولمبیا منشیات کا گڑھ بن چکا ہے اور میکسیکو کو ڈرگ کارٹیل چلارہے ہیں۔
ٹرمپ نے الزام لگایا کہ چین فینٹانائل کی اسمگلنگ کے لیے وینزویلا کو استعمال کررہا ہے ، ساتھ ہی امریکی صدر نے یہ بھی خیال ظاہر کیا کہ چینی صدر کے ساتھ ملاقات کے نتائج مثبت ہوں گے ۔
رپورٹس کے مطابق روسی تیل کمپنیوں پر پابندیوں سے متعلق سوال پر ٹرمپ کا کہنا تھا کہ روس کو 6 ماہ بعد پتا چلے گا کہ پابندیوں کے کیا نتائج نکلتے ہیں۔
انہوں نے یقین ظاہر کیا کہ اسرائیل مغربی کنارے کے انضمام سے متعلق کوئی اقدام نہیں اُٹھائے گا۔