حکومت نے فوج کے لیے ناگ میزائل سسٹم سمیت 79 ہزار کروڑ روپے کے دفاعی سودوں کو منظوری دی

نئی دہلی، 23 اکتوبر (یو این آئی) وزارت دفاع نے مسلح افواج کو جدید ہتھیاروں سے لیس کر ان کی فائر پاور بڑھانے کے مقصد سے تقریباً 79 ہزار کروڑ روپے کے دفاعی خریداری معاہدوں کو منظوری دے دی ہے ۔ ان دفاعی سودوں میں بنیادی طور پر فوج کے لیے ناگ میزائل سسٹم، گراؤنڈ بیسڈ موبائل سسٹم، کرین اور ہائی موبلٹی وہیکلز کے خریداری تجاویز شامل ہیں۔ ان میں بحریہ کے لیے نیول سرفیس گن اور فضائیہ کے طویل فاصلے کے مشنز کے لیے اہم خریداری بھی شامل ہے ۔
وزیر دفاع راج ناتھ سنگھ کی زیر صدارت جمعرات کو ہوئی دفاعی خریداری کونسل کی میٹنگ میں تقریباً 79 ہزار کروڑ روپے کے یہ خریداری منصوبے منظور کیے گئے ۔
میٹنگ کے بعد وزارت دفاع نے جاری کیے گئے بیان میں کہا کہ ان سودوں کے تحت فوج کے لیے ناگ میزائل سسٹم (ٹرَیکڈ) ایم کے ۔2، گراؤنڈ بیسڈ موبائل سسٹم اور میٹرِئیل ہینڈلنگ کرین کے ساتھ ہائی موبلٹی وہیکلز کی ضرورت کے مطابق خریداری کو منظوری دی گئی ہے ۔
ناگ میزائل سسٹم (ٹرَیکڈ) کی خریداری سے فوج کی دشمن کے لڑاکُو وہیکلز، بنکرز اور دیگر علاقائی مضبوط ٹھکانوں کو ناکارہ بنانے کی صلاحیت میں اضافہ ہوگا، جبکہ گراؤنڈ بیسڈ موبائل سسٹم دشمن کی سرگرمیوں کے بارے میں چوبیس گھنٹے الیکٹرانک انٹیلی جنس فراہم کرے گا۔ ہائی موبلٹی وہیکلز فوجوں کو مختلف جغرافیائی علاقوں میں لاجسٹک معاونت پہنچانے میں مدد دیں گے ۔