جسٹس سومین سین نے میگھالیہ ہائی کورٹ کے چیف جسٹس کے طور پر حلف لیا

شیلا نگ، 08 اکتوبر (یو این آئی) جسٹس سومین سین نے بدھ کے روز میگھالیہ ہائی کورٹ کے 14ویں چیف جسٹس کے طور پر حلف لیا۔
میگھالیہ کے گورنر چندر شیکھر ایچ وجے شنکر نے یہاں راج بھون میں نئے مقررہ چیف جسٹس کو عہدے کا حلف دلایا۔
چیف جسٹس اندرا پرسنّا مکھرجی کے پانچ ستمبر 2025 کو ریٹائر ہونے کے بعد جسٹس ہمَر سن سنگھ تھانگکھیو میگھالیہ ہائی کورٹ کے قائم مقام چیف جسٹس کے طور پر خدمات انجام دے رہے تھے ۔
حلف برداری کی تقریب میں وزیراعلیٰ کونراڈ سنگما اور ان کی کابینہ کے اراکین، اپوزیشن رہنما ڈاکٹر مُکُل سنگما، جسٹس ہمَر سن سنگھ تھانگکھیو، جسٹس وین لورا ڈیئنگدوھ، جسٹس وِشو دیپ بھٹّاہاچاریہ، چیف سیکریٹری ڈاکٹر شکیل پی احمد اور دیگر معزز شخصیات موجود تھیں۔
صدر جمہوریہ دروپدی مرمو نے 26 ستمبر کو سپریم کورٹ کولیجیم کی سفارش پر کلکتہ ہائی کورٹ کے موجودہ جج جسٹس سین کو میگھالیہ ہائی کورٹ کا چیف جسٹس مقرر کیا تھا۔ وہ حلف برداری کی تاریخ سے ہی اپنے فرائض سنبھال لیں گے ۔